سەرۆکێکی نوێ بۆ دادگای فیدراڵی دیاری کرا؛ کێیە؟

ئاڤا نیوز

 

ئەنجوومەنی باڵای دادوەری عێراق ڕایگەیاند، سەرۆکی دادگای فیدراڵی بەهۆی نەخۆشییەوە خانەنشین کرا و شوێنگرەوەی بۆ دیاریکراوە. 

 

وێنە گەورەکە: هەفتەیەک بەر لە ئێستا، شەش ئەندامی سەرەکیی دادگای باڵای فیدراڵی و سێ ئەندامی یەدەگیش، پێکەوە دەست لەکارکێشانەوەیان پێشکەش بە ئەنجوومەنی باڵای دادوەری عێراق کرد، ئەمەش بەهۆی ناکۆکی لەنێوان ئەو ئەندامانە و سەرۆکی دادگاکە لەلایەک و ناکۆکیی نێوان دادگای فیدراڵی و ئەنجوومەنی دادوەریی لەلایەکی دیکە. 

 

ڕاگەیێنراوی فەرمی: ئەنجوومەنی باڵای دادوەریی عێراق ڕایگەیاند، جاسم محەممەد عمێری، سەرۆکی دادگای باڵای فیدراڵی بەهۆکاری تەندروستیی خانەنشین کرا و دادوەر مونزەر ئیبراهیم حوسێن، جێگری سەرۆکی دادگای تێهەڵچوونەوەی فیدراڵی لەشوێنی کاندید کراوە، هاوکات ئەنجوومەنەکە داوای لە سەرۆکی کۆمار کردووە فەرمانی دامەزراندنی دەربکات.

 

ئەوەی پێویستە بیزانیت: دادگای فیدراڵی سەرۆک و هەشت ئەندامی سەرەکی هەیە، لەگەڵ چوار ئەندامی یەدەگ کە بەمشێوەیە بەسەر پێكهاتەکان دابەشبوون: شیعە سەرۆکی دادگا و چوار ئەندامی هەیە، سوننە دوو ئەندام و کوردیش دوو ئەندام.

 

بایۆگرافیا: دادوەر مونزەر ئیبراهیم حوسێن، لە دایکبووی ساڵی 1963ی بەغدایە و خاوەن بڕوانامەی یاسایە لە زانکۆی بەغدا، هاوکات لە ساڵی 2018ەوە لە دادگای تێهەڵچوونەوە کار دەکات و تا ئەمڕۆ پۆستی جێگری سەرۆک و سەرۆکی دەستەی سزا بوو لە دادگەکە و هاوکات ئەندامی یەدگی دادگەی فیدراڵی.