ئێران: دڵنیا نین ئیسرائیل ئاگربەست جێبەجێ بکات

ئاڤا نیوز

سوپاسالار و فەرماندەی گشتیی هێزە چەکدارەکانی ئێران دەڵێت: گومانمان هەیە ئیسرائیل ڕێککەوتنی ئاگربەست جێبەجێ بکات.

وێنە گەورەکە: دوای پێنج ڕۆژ لە ڕاگەیاندنی ئاگربەستی نێوان ئیسرائیل و ئێران، تاران هۆشداری دەدات لە ئەگەری پابەندنەبوونی ئیسرائیل بە ئاگربەستەوە، بە هەموو هێزەوە وەڵام دەدەنەوە.

 

لێدوانی فەرمی: عەبدولڕەحیم مووسەوی، سوپاسالار و فەرماندەی گشتیی هێزە چەکدارەکانی ئێران ڕایگەیاند: ئێمە شەڕمان دەستپێنەکردووە، بەڵام بە هەموو تواناکانمانەوە وەڵامی هێرشەکانمان داوەتەوە. هەروەها باسی لەوەش كرد كە ئەوان گومانیان لە ئیسرائیل هەیە لە جێبەجێكردن و پابەندبوون بە ئاگربەست و ئەگەر هەر هێرشێکیان بكرێتە سەر ئەوا ئامادەن و بە هەموو هێزەوە وەڵام دەدەنەوە.

باکگراوند: ڕۆژی 13-6-2025، ئیسرائیل هێرشی کردە سەر بنکە ئەتۆمییەکانی ئێران و چەندین بەرپرس و زانای ئەتۆمی ئەو وڵاتەی بە ئامانج گرت، دواتر ڕۆژی سێشەممە، 24-06-2025، ئاگربەستی نێوان ئێران و ئیسرائیل بە نێوەندگیریی ئەمریکا ڕاگەیێنرا و کۆتایی بە جەنگی 12 ڕۆژەی نێوانیان هات.