عەباس عێراقچی بۆ نەتەوە یەکگرتووەکان: دەبێت ئەمریکا و ئیسرائیل قەرەبووی ئێران بکەنەوە

ئاڤا نیوز

وەزیری دەرەوەی ئێران نامەیەک ئاراستەی سکرتێری گشتی نەتەوەیەکگرتووەکان دەکات و داوای ناساندنی ئەمریکا و ئیسرائیل وەک تاوانباری دەستپێکردنی جەنگ بۆ سکرتێری گشتی ڕێکخراوەکە دەخاتەڕوو.

وێنە گەورەکە: " جەنگی 12 ڕۆژە " لە نێوان ئیسرائیل و ئێران و بەشداری ئەمریکا بە هێرشێکی ئاسمانی بۆ سەر پێگە ئەتۆمییەکانی ئێران، ڕۆژهەڵاتی ناوەڕاستی خستۆتە قۆناغێکی نادیار و پڕ لە ئەگەری مەترسیدار، سەرەڕای ڕاگەیاندنی ئاگربەست بەڵام ئیسرائیل و ئێران بەردەوامن لە تۆمەتبارکردنی یەکتر و بە سەرچاوەی تیرۆری ڕۆژهەڵاتی ناوەڕاست یەکتر تۆمەتبار دەکەن.

بڵاوکراوەی فەرمی: وەزارەتی دەرەوەی ئێران دەقی نامەی عەباس عێراقچی، وەزیری دەرەوەی ئەو وڵاتەی بۆ ئەنتۆنیۆ گۆتێرێز، سکرتێری گشتی نەتەوەیەکگرتووەکان بڵاوکردەوە، عێراقچی لە نامەکەدا سەرەڕای داواکاری بۆ ناساندنی ئەمریکا و ئیسرائیل بە دەسترێژیکار بۆ سەر سەروەری و خاکی ئێران، نوسیویەتی: ئەمریکا و ئیسرائیل پێشێلکارییان دژ بە بڕگەی چواری مادەی دووی پەیڕەوی نەتەوەیەکگرتووەکان کردووە و دەبێت بە پێشێلکار و یاساشکێن بناسرێن، لە بەرامبەر ئەو زەرەر و زیانانەی کە لە ئەنجامی هێرشی هەردوو وڵاتی دەستدرێژیکار کەوتووەتەوە، دەبێت نەتەوەیەکگرتوەکان بەرپرسیارێتی بخاتە سەر واشنتن و تەلئەبیب و بە بڕیارێک ناچاریان بکات بە قەرەبووکردنەوەی ئێران.

زانیاریی زیاتر: عەباس عێراقچی لە درێژەی نامەکەدا نوسیویەتی: ئەمریکا و ئیسرائیل هێرشیان کردووەتە سەر پێگە ئەتۆمییەکانی ئێران لە شارەکانی قوم، ئاراک، نەتەنز و ئەسفەهان لە کاتێکدا ئەم پێگانە لەژێر چاودێری ئاژانسی نێودەوڵەتیی ئەتۆم بوون و بەپێی یاسای نێودەوڵەتیی کارەکانیان بەڕێوەچووە.