لە شارێکی سووریا دەست بەسەر ملیۆنێک و 700 هەزار حەبی کاپتاگۆندا دەگیرێت

ئاڤا نیوز

لە چوارچێوەی ئۆپەراسیۆنێکی ئەمنیی تۆکمەدا لە شاری دەرعای سووریا، دەست بەسەر ملیۆنێک و 700 هەزار حەبی کاپتاگۆندا دەگیرێت.

وێنە گەورەکە: لە سەردەمی دەسەڵاتی بەشار ئەسەد، سووریا ببوو بە ناوەندی بەرهەمهێنانی حەبی کەپتاگۆن و لەوێوە ڕەوانەی وڵاتانی دیکەی عەرەبی دەکرا، لەم بوارەشدا حکومەت بە کارئاسانیکردن بۆ بەرهەمهێنانی ئەو ماددە هۆشبەرە تۆمەتبار دەکرا.

بڵاوکراوەی فەرمی: بەگوێرەی هەواڵێکی ئاژانسی فەرمیی سووریا "سانا" لە چوارچێوەی ئۆپەراسیۆنێکی ئەمنیی تۆکمەدا، لقی بنەبڕکردنی ماددە هۆشبەرەکان لە دەرعا هەڵیکوتایە سەر چەند کۆگایەک لە ڕۆژهەڵاتی پارێزگاکە، کە بڕێکی زۆر ماددەی هۆشبەری تێدا هەڵگیرابوو و ئامادەکرابوو بۆ بەقاچاخبردن بۆ دەرەوەی وڵات.

زانیاریی زیاتر: بەپێی سەرچاوە ئەمنییەکان، کە قسەیان بۆ ئاژانسەکە کردووە، لە میانی ئۆپەراسیۆنەکەدا دەستبەسەر یەک ملیۆن و 700 هەزار حەبی هۆشبەر لە جۆری کاپتاگۆن دا گیرا.