دادگاییکردنی نەتەنیاهۆ بۆ ماوەی دوو هەفتە دواخرا

ئاڤا نیوز

لەسەر داوای نەتەنیاهۆ دادگای ئۆرشەلیم، دانیشتنی ئەم هەفتەیەی بۆ دادگاییکردنی سەرۆکوەزیرانی ئیسرائیل هەڵوەشاندەوە.

وێنە گەورەکە: بنیامین نەتەنیاهۆ، سەرۆکوەزیرانی ئیسرائیل بەتۆمەتی کەیسی بەرتیلدان و ساختەکاری و پێشێلکردنی متمانەی پۆستەکەی دادگایی دەکرێت و ئەگەر بسەلمێنرێت، دەتوانێت ببێتە هۆی زیندانیکردنی.

زانیاریی بەدەستهاتوو: میدیاکانی ئیسرائیل دەڵێن، لە دانیشتنێکی داخراودا نەتەنیاهۆ داوایکردووە بەهۆی دۆخی ئەمنی ئیسرائیل و ئاگربەستەکانیان لەگەڵ ئێران و حەماس پێویستە دانیشتنی دادگا بۆ دوو هەفتە دابخرێت.

لێدوانی فەرمی: دەستەی دادوەری دادگای ئۆرشەلیم ڕایانگەیاند، لەبەر ڕۆشنایی ئەو ڕوونکردنەوانەی پێشکەشکرابوون، بەشێکی داواکارییەکە جێبەجێ دەکەین و لەم قۆناغەدا ڕۆژانی وەرگرتنی وتەی نەتەنیاهۆ هەڵدەوەشێنینەوە کە بڕیاربوو لە 30ـی حوزەیران و 2ـی تەمموزدا بەڕێوەبچێت.

لەلایەکی دیکەوە: دۆناڵد ترەمپ، سەرۆکی ئەمریکا چەندین جار داوایکردووە دادگاییکردنی نەتەنیاهۆ هەڵبوەشێندرێتەوە و بە پاڵەوانی جەنگ ناوی دەبات، دەڵێت نەتەنیاهۆ سەرقاڵی ئازادکردنی بارمتەکانە لە غەززە، چۆن دەکرێت ناچاری بکەن لەسەر هیچ بە درێژایی ڕۆژ لە هۆڵی دادگەدا دابنیشێت، لێی بگەڕێن با کارەکانی بکات.