بازرگانانی هەولێر فێری زمانی چینی دەكرێن

ئاڤا نیوز

بە مەبەستی بەرزكردنەوەی توانای زمانەوانیی ئەو بازرگانانەی، كاڵا لە وڵاتی چینەوە هاوردە دەكەن، لە هەولێر خولێكی فێربوونی زمانی چینی بۆ 60 بازرگان و خاوەنكار کرایەوە.

چیرۆكی سەرەكی: ڕۆژی یەکشەممە، 29ـی حوزەیران، یاداشتنانەی لێكتێگەیشتنی نێوان ژووری بازرگانی و پیشەسازیی هەولێر و زانكۆی جیهان بۆ بەرزكردنەوەی توانای مرۆیی و لێهاتوویی بازرگانان، واژۆ كرا.

لێدوانی فەرمی: كامەران سەڵاح، جێگری سەرۆكی ژووری بازرگانی و پیشەسازیی هەولێر ڕایگەیاند، بەهۆی ئەو پەیوەندییە بازرگانیە بەهێزەی لەنێوان هەرێمی كوردستان و وڵاتی چیندا هەیە و، لەبەر پێویستی بازرگانان و خاوەنكاری كورد بە شارەزابوون لە زمانی چینی،  خولی فێربوونی زمانی چینی بۆ 60 بازرگان و پیشەوەر كراوەتەوە.

ئەوەی پێویستە بیزانیت: ئاڵوگۆڕی بازرگانی و وەبەرهێنانی نێوان هەرێمی كوردستان و وڵاتی چین گەیشتووەتە ئاستێكی بەرز و زۆربەی كەل و پەلە دروستكراوەكانی وڵاتی چین و بەرهەمەكانی ئەو وڵاتە لەلایەن بازرگانان و خاوەنكارەكانەوە دەهێنرێنە ناوخۆی هەرێمی كوردستان.