دژەتیرۆری کوردستان: هیچ درۆنێک لە سنووری هەولێر نەکەوتووەتە خوارەوە

ئاڤا نیوز

لە ڕاگەیێنراوێکدا دژەتیرۆری کوردستان هەواڵی کەوتنەخوارەوەی درۆن لە ناحیەی بەحرکەی هەولێر ڕەت دەکاتەوە.

ڕاگەیێنراوی فەرمی: دژەتیرۆری کوردستان دەڵێت، "لای خۆمانەوە ڕایدەگەیێنین، ئەم هەواڵە بێبنەما و ناڕاستە و هیچ جۆرە درۆنێک لە سنووری پارێزگای هەولێر نەکەوتووەتە خوارەوە".

لەلایەکی دیکەوە: تۆڵا مەهدی، بەڕێوەبەری ناحیەی بەحرکە، لە لێدوانێکدا بە ئاڤای ڕایگەیاند: "ئەو هەواڵانەی بڵاوبوونەتەوە و باس لە کەوتنەخوارەوەی فڕۆکەیەکی بێفڕۆکەوانی نەناسراو لە ناحیەکە دەکەن، هیچ بنەمایەکیان نییە و دوورن لە ڕاستییەوە."

ئەمە لە کاتێکدایە کە ئەمڕۆ ئێوارە، ژمارەیەک دەزگای ڕاگەیاندن هەواڵێکیان بڵاوکردەوە کە گوایە "فڕۆکەیەکی بێفڕۆکەوانی نەناسراو لە ناحیەی بەحرکەی سەر بە پارێزگای هەولێر کەوتووەتە خوارەوە".