هۆشیار زێباری داوای دووبارە پێکهێنانەوەی دادگای باڵای فیدراڵی دەکات

ئاڤا نیوز

هۆشیار زێباری، ئەندامی مەکتەبی سیاسیی پارتی دیموکراتی کوردستان، داوا دەکات دادگای باڵای فیدراڵیی عێراق دووبارە پێکبهێنرێتەوە، بە مەبەستی بەدیهێنانی سەقامگیریی سیاسی و پاراستنی سەربەخۆیی دەسەڵاتی دادوەری.

چیرۆکی سەرەکی: ئەنجوومەنی باڵای دادوەری، بەیانیی ڕۆژی یەکشەممە، خانەنشینکردنی دادوەر جاسم محەممەد عەبود عومێری، سەرۆکی دادگای باڵای فیدراڵی (بەرزترین دەسەڵاتی دادوەری لە عێراق) ڕاگەیاند، "بەهۆی هۆکاری تەندروستییەوە"، و کاندیدکردنی جێگری سەرۆکی دادگای تەمیزی فیدراڵی، دادوەر سەید مونزر ئیبراهیم حوسێنی لە شوێنی ئەو ڕاگەیاند.

بڵاوکراوەی فەرمی: هۆشیار زێباری لە بڵاوکراوەیەک لە تۆڕی کۆمەڵایەتی ئێکس دەڵێت، "دادپەروەری بنەمای دەسەڵاتە" و ڕایگەیاندووە کە دوای ئەو قەیرانە دادوەرییەی لەگەڵ دادگای باڵای فیدراڵی دروست بووە، کاتی ئەوە هاتووە هەموو لایەنەکان داوای دووبارە پێکهێنانەوەی دادگاکە بکەن.

ئەندامەکەی مەکتەبی سیاسیی پارتی جەختی کردووەتەوە کە پێویستە ئەم هەنگاوە بەپێی ڕێکارە دەستوورییەکان و بە تایبەتی ماددەی 92، بڕگەی دووەمی دەستووری عێراق، ئەنجام بدرێت.

زانیاریی زیاتر: هۆشیار زێباری ئامانجی ئەم داواکارییەی ڕوون کردووەتەوە و نووسیویەتی کە ئەم کارە بۆ گەیشتن بە "سەقامگیریی سیاسی بۆ دەوڵەتی عێراقی فیدراڵی دیموکراتی یەکگرتوو و مسۆگەرکردنی سەربەخۆیی دەسەڵاتی دادوەری دوور لە سیاسییکردن" پێویستە.

ئەوەی پێویستە بیزانیت: دادگای باڵای فیدراڵیی عێراق لە 19ـی حوزەیرانی ئەمساڵدا، دەستلەکارکێشانەوەی نۆ ئەندامی بەخۆیەوە بینی، کە شەشیان ئەندامی سەرەکی و سێیان یەدەگ بوون.