مامەڵەی گۆڕینی شوێنی نیشتەجێبوون تەنها بە هەژماری بانكی دەكرێت و پارەدانی كاش وەستێنرا

ئاڤا نیوز

ئەو هاووڵاتیانەی بەنیازی گۆڕینی شوێنی نیشتەجێبوونیانن، ئاگادار دەكرێنەوە كە بە بێ كارتی بانكی، سەردانی هیچ كام لە نووسینگەكانی زانیاری نەكەن، بەو پێیەی ڕاییكردنی مامەڵەكان بە پارەدانی كاش، ڕاگیراوە.

ڕاگەیێنراوی فەرمی: بەڕێوەبەرایەتیی نووسینگەكانی زانیاری، لە ڕاگەیێنراوێكدا ڕێكارە نوێیەكانی مامەڵەی گۆڕینی شوێنی نیشتەجێبوونی ڕوونكردووەتەوە و هاووڵاتیانیش ئاگادار دەكاتەوە لەوەی، سیستمی پارەدانی كاش لە هیچ نووسینگەیەك نەماوە و پێویستە هاووڵاتی خۆی یان كەسە نزیكەكانی خاوەنی هەژماری بانكی بن بۆ ڕاییكردنی مامەڵەكانیان.

بابەتە ستراتیژییەكە: بۆ پارەدانی ڕسووماتی مامەڵەكە، بە كاش پارە وەرناگیرێت، بەڵكو دەبێت هاووڵاتی کارتی بانکی (ڤیزاکارت یان ماستەرکات)ـی هەبێت و بە بێ كارتی بانكی، هیچ مامەڵەیەك ڕایی ناكرێت.

لەلایەكی دیكەوە: ئەو ھاووڵاتییانەی کارتی زانیارییان ون کردووە، پێویستە نووسراوی بەشی پۆلیسی ونبووەکان ببەن كە ئاڕاستەی نووسینگەكانی كارتی زانیاری كرابێت.