بازاڕی قەیسەریی هەولێر ڕووناك دەكرێتەوە

ئاڤا نیوز

دانانی ڕووناكی لەنێو كۆڵان و ڕێڕەوەكانی نێو بازاڕی قەیسەریی هەولێر، دیمەنێكی ناوازە و قەشەنگی بە بازاڕەكە داوە و بایەخی گەشتیاریی سەنتەری شاری هەولێر قۆناغێك بردووەتە پێش.

چیرۆكی سەرەكی: دوای زیاتر لە ساڵێك لە كاركردنی بەردەوامی تیمەكانی شارەوانی و لایەنە پەیوەندیدارەكانی دیكەی حكومەتی هەرێمی كوردستان، كارەكانی نۆژەنكردنەوەی بازاڕی قەیسەریی هەولێر بەكۆتاهات، لە نوێترین گۆڕانكاری نێو بازاڕەكەش ڕێڕەوی پیادە و كۆڵانەكانی نێو بازاڕەكە ڕووناك كرایەوە.

لێدوانی فەرمی: ئومێد خۆشناو، پارێزگاری هەولێر بە ئاڤای ڕاگەیاند، لە چوارچێوەی فەرمان و ڕاسپاردەکانی سەرۆکی حکومەتی هەرێمی کوردستان، بۆ نۆژەنکردنەوە و پاراستنی مێژووە جوانەكەی، دیزاینی بازاڕی قەیسەریی هەولێر بە دانانی ڕووناكی لەنێو شەقام و كۆڵانەكانیدا، جوانتر و درەوشاوەتر بووە.

ئەوەی پێویستە بیزانیت: وێڕای لایەنە کولتووری و مێژووییەکەی، بازاڕی قەیسەری بووەتە ناوەندێکی گەورەی ئابووری و دابینكردنی بژێویی ژیانی هەزاران خێزانی هەولێر و شوێنەكە لەڕووی گەشتیاریشەوە بایەخێكی زۆری هەیە.

باكگراوند: شەوی 5ـی ئایاری 2024، چەند کەسێک گڕیان لە بازاڕی مێژوویی قەیسەری بەردا و بەهۆیەوە 227 دوکان و پێنج کۆگا سووتان، دەیان دوکانی دیکەش زیانیان بەرکەوت، ڕۆژێک دوای ڕووداوەکە؛ لە سەر ڕاسپاردەى سەرۆکوەزیران مه‌سرور بارزانی، لەپاڵ بڕیارى نۆژەنکردنەوەی بازاڕەکە بە گوژمەی حەوت ملیار دینار، بڕیاری هاوکاریکردن و یارمەتیدانى دوکاندارانى زیانلێکەوتوو درا.