هەسەدە كوژرانی ئەندامێكی ڕادەگەیەنێت

ئاڤا نیوز

هێزەكانی سووریای دیموكرات 'هەسەدە'، كوژرانی ئەندامێكی سەر بە هێزەكانی ڕاگەیاند، كە لە كاتی جێبەجێكردنی ئەركەكەی لە ڕووبەڕووبوونەوەیەكی سەربازی كوژرا.

وێنە گەورەكە: دوای ڕووخانی دەسەڵاتی بەشار ئەسەد لە سووریا و هاتنە كایەی حكومەتێكی نوێ، شەڕ و پێكدادان لەنێوان هێزە كوردییەكان و گروپە چەكدارەكانی نزیك لە توركیا، لەو ناوچانە دروستبوو كە لە ژێر دەسەڵاتی (هەسەدە)دا بوون، سەرەڕای ئەوەی بە نێوەندگیری ئەمریكا و هاوپەیمانی نێودەوڵەتی هێرش و پێكدادانەكان وەستان، بەڵام ناوە ناوە ڕووبەڕووبوونەوەی چەكداری لەنێوانیاندا ڕوودەدات.

ڕاگەیێنراوی فەرمی: ناوەندی ڕاگەیاندنی هەسەدە، ڕاگەیێنراوێکی بڵاوكردەوە، تێیدا كوژرانی ئەندامێكی بە ناوی محەممەد حەسەن نەجیم، كە نازناوی لەنێو هێزەكانی هەسەدە 'جێگر حەسەكە' بوو، دووپاتكردووەتەوە لە كاتی جێبەجێكردنی ئەركەكەی لە بەرەنگاربوونەوەیەكی سەربازی كوژراوە.

زانیاریی زیاتر: ئەو ئەندامەی هێزەكانی هەسەدە لە تەكنەلۆژیای سەربازی شارەزا بووە و پسپۆڕی لە بەكارهێنانی ئەپلیكەیشنی سەربازیدا هەبووە و بەشداری لە ئۆپەراسیۆنە سەربازییەكان بۆ ڕزگاركردنی ناوچەكانی حەسەكە، جەبەل عەزیز، ڕەققە، دێرەزۆر، ڕاسولعەین، منبج، كۆبانێ، عەین عیسا و زیندانی سناعە کردووە، ئەوەش بەپێی ڕاگەیێنراوەكەی هەسەدە.