پڕۆسەی وردبینی بۆ فۆڕمی وەرگرتنی زەوی تەواو دەبێت

ئاڤا نیوز

دوای نزیکەی ساڵێک، ئەمڕۆ پڕۆسەی وردبینی بۆ فۆڕمی وەرگرتنی زەوی تەواو دەبێت و تیمەكانی وەزارەتی شارەوانی  کەمتر و تەنیا بۆ کاتی پێویست دەمێننەوە.

وێنە گەورەکە: 450 هەزار فۆڕمی دابەشكردنی زەوی وردبینی بۆ کراوە و بەشێکی زۆریان گەڕێنراونەتەوە بۆ شارەوانییەکان. لەوێش بە گوێرەی خاڵ، زەوی دەدرێتە فەرمانبەران.

لێدوانی فەرمی: سەربەست مەولوود، سەرپەرشتیاری تیمی وردبینیی پڕۆسەی دابەشکردنی زەوی له‌ وه‌زاره‌تی شاره‌وانی، بە ئاڤای گوت، "ئەمڕۆ پڕۆسەی وردبینی تەواو دەبێت، هیچ فۆڕمێک نەماوە وردبینی بۆ بکرێت و هەمووی تەواو کراوە، ئەوە ماوەتەوە كە لە شارەوانییەکان و بە پێی فۆڕمەكان دەست بە دابەشکردنی زەوی بکرێت."

ئەمەش بزانە: ئێستا 27 هەزار فۆڕم لە ئەنجوومەنی وەزیرانن بۆ پێدانی ڕەزامەندی و لەم ڕۆژانەشدا نزیکەی 20 هەزار فۆڕمی دیکە لە وەزارەتی شارەوانییەوە ڕەوانەی ئەنجوومەنی وەزیران دەکرێن.