فایلی خەڵک: ئاڤا داواکاریی دەیان هاووڵاتی لە هەولێر دەگەیێنێتە لایەنی پەیوەندیدار

ئاڤا نیوز

 

دەیان هاووڵاتی لە دەورووبەری هەولێر ناتوانن زەوییەکان بکەن بە خانوو، ئاڤا میدیا دەنگیان دەگەیێنێتە لایەنی پەیوەندیدار و هەوڵدەدرێت لە داهاتوویەکی نزیکدا داواکارییەکانیان جێبەجێ بکرێت و کێشەیان بۆ چارەسەر بکرێت. 

 

چیرۆکی سەرەکی: ئەو هاونیشتمانیانە لە دەورووبەری هەولێر پارچە زەوییان هەیە و تاپۆکەی لەسەر ناوی خۆیانە، بەڵام تاوەکو ئێستا خزمەتگوزاریی بۆ گەڕەکەکان نەڕۆیشتووە و نەیانتوانیوە بۆ دروستکردنی خانوو سوودی لێ وەربگرن، نموونەی پارچە زەوییەکان لە دەورووبەری سێبەردان، گڕەسۆر، گردجووتیار و گەڕەکی دیکەی هەولێرن.

 

لێدوانی فەرمی: کارزان هادی، سەرۆکی شارەوانی هەولێر بە ئاڤای ڕاگەیاند: هەوڵدەدەین لە داهاتوویەکی نزیکدا خزمەتگوزاریی بگەیێنینە ئەو گەڕەکانە و هاووڵاتییانمان دەست بە دروستکردنی خانوو بکەن لەسەر زەوییەکانیان.

بە گوتەی سەرۆکی شارەوانیی هەولێر، سەرەڕای گرفتە داراییەکان بەڵام هەوڵەکانی حکومەت بۆ گەیاندنی خزمەتگوزاریی بە گەرەکەکان بەردەوامە، لەم چوارچێوەیەشدا هەموو هەوڵێک دەدەین تاوەکو هاووڵاتییان سوود لە خزمەتگوزارییەکان وەربگرن و زەوییەکانیان بکەن بە خانوو.