پەرلەمانی عەرەبی دژی هێرشەکەی ئێران پاڵپشتی بۆ عێراق دەردەبڕێت

ئاڤا دیجیتاڵ

 

هێرشە مووشەکییەکەی ئێران بۆ سەر هەولێر، کاردانەوەی ناوخۆیی و جیهانی لێکەوتەوە و هەمووان سەرکۆنەیان کرد. ئەمڕۆش لە کۆبوونەوەی پەرلەمانی عەرەبی باسی هێرشە کراوە. 

 

چیرۆکە سەرەکییەکە: ئەمڕۆ چوارشەممە 17-01-2024 پەرلەمانی عەرەبی لە قاهیرە کۆبووەوە و هێرشە مووشەکییەکەی ئێرانی بۆ سەر هەولێر تاوتوێ کرد. وڵاتانی عەرەبی نیگەرانیی خۆیان بۆ هێرشە "دوژمنکارییەکەی" ئێران دەربڕی.

 

لێدوانی فەرمی: لە کۆبوونەوەی ئەمڕۆی پەرلەمانی عەرەبی، وڵاتە عەرەبییەکان سەرکۆنەی هێرشەکەی ئێرانیان کرد و ڕایانگەیاند: "ئەم دەستدرێژییەی ئێران کە ڕەچاوی سادەترین ڕێساکانی ڕێزگرتن لە دراوسێیەتی نەکرد، پێشێلکارییەکی ئاشکرایە بۆ سەروەریی عێراق و ئاسایشی گەلە ئازیزەکەی، دەستدرێژییەکی ئاشکرایە بۆ سەر ئاسایشی نەتەوەیی عەرەبی، چونکە ئەو ئاسایش و سەقامگیرییەی عێراق بەشێکی دانەبڕاوە لە ئاسایشی وڵاتانی عەرەبی". 

پەرلەمانی عەرەبی ئەوەشیان ڕایگەیاند: "هێرشکردنە بۆ سەر عێراق هێرشکردنە بۆ سەر نەتەوەی عەرەب". 

 

زانیاریی زیاتر: لە کۆبوونەوەکەدا، پەرلەمانی عەرەبی هاوسۆزی خۆی بۆ گەلی عێراق دەربڕی و پاڵپشتیی وڵاتانی عەرەبییان بۆ پاراستنی سەروەری، سەقامگیری و پاراستنی ئاسایشی عێراق دووپاتکردەوە.

 

باکگراوند: پەرلەمانی عەرەبی، دەزگای یاسادانانی کۆمکاریی دەوڵەتانی عەرەبییە و 22 وڵاتی عەرەبی تێیدا ئەندامن.