خۆڵبارین هەرێمی کوردستان دەگرێتەوە و پێشبینی بارانبارینیش دەکرێت

ئاڤا نیوز

شەپۆلێکی خۆڵبارین بە چڕی ناوەڕاست و خوارووی عێراقی گرتووەتەوە و کاریگەرییەکەی هەرێمی کوردستانیش دەگرێتەوە. بەپێی پێشبینییەکان هەفتەی داهاتوو لە هەرێمی کوردستان باران دەبارێت.

ڕاگەیێنراوی فەرمی: ده‌سته‌ی كه‌شناسی عێراق لە ڕاگەیێنراوێکدا ئاماژە بۆ ئەوە دەکات، ئەو شەپۆلە خۆڵبارینەی هەڵیکردووەتە سەر عێراق ڕۆژی سێشەممە چری زیاتر بێت و پلەی گه‌رماش به‌شێوه‌یه‌كی به‌رچاو نزم ببێتەوە، ئەو شەپۆڵە خۆڵبارینەش تا کۆتایی ئەم هەفتەیە بەردەوام دەبێت.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا لە گەشتی هەواڵەکانی کاتژمێر 07:00 ڕایگەیاند: ئەو شەپۆلە خۆڵبارینە کاریگەری لەسەر گەرمیان زیاتر دەبێت، بەڵام لە هەولێر و سلێمانی لاواز دەبێت، لە دهۆک و ئیدارەی سەربەخۆی سۆرانیش هەستی پێناکرێت، چونکە ئاراستەی با باکووری ڕۆژئاوایە و خۆڵبارینەکە لە باشووری ڕۆژئاواوە بۆ ناو عێراق هەڵدەکات.

شێخ دارا دەڵێت، پێشبینی دەکرێت لە هەفتەی داهاتوو لە هەندێک ناوچەی هەرێمی کوردستان باران ببارێت.