ئەردۆغان: ڕێگە بە هیچ کەس و لایەنێک نادەین پرۆسەی ئاشتی پەک بخات

ئاڤا نیوز

سەرۆککۆماری تورکیا پرۆسەی ئاشتی بە قۆناغێکی زۆر گرنگ ناو دەبات و چەند هەوڵێک بۆ پەکخستنی پرۆسەی ئاشتی ئاشکرا دەکات. دەشڵێت، دەبێت نێوخۆی تورکیا ماڵێکی یەکگرتوو و بێ کێشە و بێ تیرۆر بێت.

وێنە گەورەکە: لەچوارچێوەی لێکەوتەکانی بانگەوازی عەبدوڵا ئۆجەلان و بڕیاری خۆهەڵوەشاندنەوەی پەکەکە، کۆبوونەوەی شاندی دەم پارتی لەگەڵ پارتە سیاسییەکانی تورکیا بەردوامی هەیە و هەموو لایەنەکان جەخت لەسەر جێبەجێکردنی هەنگاو و بڕیارەکان دەکەن بۆ سەرخستنی پرسی ئاشتی لە تورکیا.

لێدوانی فەرمی: ڕەجەب تەیب ئەردۆغان، سەرۆککۆماری تورکیا ئەمڕۆ دووشەممە لە کۆنگرەیەکی ڕۆژنامەوانیدا جەختی لەسەر گرنگی پرۆسەی ئاشتی کردەوە و ڕایگەیاند: دواین ڕووداوەکانی ڕۆژهەڵاتی ناوەڕاست گرنگی پرۆسەی ئاشتی زیاتر دەرخست و دەبێت نێوخۆی تورکیا ماڵێکی یەکگرتوو و بێ کێشە و بێ تیرۆر بێت، تاوەکو ئێستا هەنگاوی زۆر باشمان ناوە بەرەو ئاراستەی سەرخستنی پرۆسەی ئاشتی و بەدیهێنانی ئامانجی گەورەی تورکیای بێ تێرۆر.

لە درێژەی وتەکانیدا، ئەردۆغان ئاماژەی بە چەند هەوڵێک کرد بۆ دروستکردنی بەربەست لە بەردەم پرۆسەی ئاشتی و ڕایگەیاند: ئەوە باش دەزانین چەند کەس و لایەنێک لە نێوخۆی تورکیا و لە نێو پەکەکەش هەوڵی دروستکردنی بەربەست لە بەردەم پرۆسەکە دەدەن بەڵام دەوڵەت بە هیچ شێوەیەک ڕێگە بە سەرکەوتنی ئەو هەوڵانە نادات و شکستیان پێدەهێنێت.

باکگراوند: لە چوارچێوەی پرۆسەی ئاشتی و لەسەر داوای عەبدوڵڵا ئۆجەلان، پارتی کرێکارانی کوردستان 'پەکەکە' 12ـەمین کۆنگرەی خۆی لە ڕۆژانی 5 تا 7ـی مانگی پێنجی ئەمساڵ بەست، لە کۆنگرەکەدا پەکەکە کۆتایی بە خەباتی چەکداری هێنا و بڕیاری چەکدانان و خۆ‌هەڵوەشاندنەوەی ڕاگەیاند، بەرپرسیاریێتی قۆناغی داهاتووشی خستە ئەستۆی تورکیا لە زامنکردنی مافەکانی گەلی کورد لە باکووری کوردستان.