نزیکەی 400 هەزار کەس لە ماددەی 140 قەرەبوو نەکراونەتەوە

ئاڤا نیوز

 

حکومەتی عێراق لە جێبەجێکردنی ماددەی 140 کەمتەرخەمە و نوێنەری حکومەتی هەرێمی کوردستان دەڵێت: دەبوو 15 ساڵ لەمەوبەر حکومەتی عێراق کێشەی قەرەبووی نەهێشتبایە.

 

وێنە گەورەکە: ماددەی 140 لە دەستووری عێراق تایبەتە بە ئاساییکردنەوە دۆخی ئەو ناوچانەی لە سەردەمی ڕژێمی بەعس دیموگرافیایان گۆڕاوە، دەبوو تاوەکو 2007-12-31 ماددەکە جێبەجێ بکرێت، بەڵام حکومەتە یەک لەدوای یەکەکانی عێراق جێبەجێکردنی ئەم ماددەیان پشتگوێخست، ئەمە کاریگەریی نەرێنی لە سەر دەیان هەزار هاووڵاتی دروست کردووە و خەڵکێکی زۆر چاوەڕێی قەرەبووکردنەوەن.

 

لێدوانی فەرمی: دژوار فایەق، نوێنەری حکومەتی هەرێمی کوردستان لە لیژنەی ماددەی 140 بە ئاڤای ڕاگەیاند: ماددەی 140 وەکو خۆی جێبەجێ نەکراوە و حکومەتە یەک لە دوای یەکەکانی عێراق پشتگوێیان خستووە، هەروەها لەلایەن نەتەوەکانی دیکەوە تێگەیشتنێک دروست بووە کە ماددەی 140 تەنیا لە بەرژەوەندی کوردە، بێ ئاگان لەوەی گۆڕینی دیمۆگرافیا زیاتر کوردی گرتووەتەوە و ئێمە تێیدا زەرەرمەند بووین.

 

زانیاریی زیاتر: بە وتەی دژوار فایەق، جێبەجێکردنی ماددەی 140 تەنیا گەڕانەوەی ماف نییە بۆ کورد، بەڵکو نەتەوەکانی دیکەش زەرەرمەندی دەستی بەعس بوون و پێویستە قەرەبوو بکرێنەوە، ئێمە لە بەدەستهێنانی مافی هاووڵاتیانی کورد پاشەکشە ناکەین و پێویستە قەرەبوو بکرێنەوە.

- قەرەبووکردنەوە بۆ کورد 10 ملیۆن دینار و عەرەب 20 ملیۆن دینارە.

- حکومەتی عێراق بەبیانووی نەبوونی سیولە قەرەبووەکەی ڕاگرتووە.

- کورد بە ناوچەکانی ماددەی 140ـەوە لە سەدا 27ـی عێراق پێکدە‌هێنێت.