بۆچی ڕێککەوتی 1-7 ڕۆژی لەدایکبوونی بەشێکی زۆری خەڵکی عێراقە؟

ئاڤا نیوز

 

ساڵانە لە ڕێککەوتی 1-7 بەشێکی زۆری خەڵکی عێراق ڕۆژی لەدایکبوونیەتی، ئەمەش هەر لەخۆوە نییە، بەڵکو پەیوەندی هەیە بە ڕووداوێکەوە کە مێژووەکەی دەگەڕێتەوە بۆ ساڵی 1957.

 

هۆکارە زانراوەکان: لە ڕەگەزنامەی باری شارستانیی سلێمانی، چیرۆکی دیاریکردنی ئەو ڕۆژەیان بۆ ئاڤا میدیا باسکرد، کە هۆکارەکەی دەگەڕێتەوە بۆ یەکەم سەرژمێریی زانستی و تەواو لە 12-10-1957، بەر لەوە سێ سەرژمێری دیکە ئەنجام درابوون، بەڵام هیچیان وەک سەرژمێری ئەو ساڵە ورد و زانستی نەبوون. ئەو کاتە گرفتێک بۆ پڕۆسەکە هاتەپێش، بەشی زۆری هاونیشتمانیان ڕێککەوتی لەدایکبوونیان دیار نەبوو، حکومەتی عێراق لەو ساڵە بە بڕیاری ژمارە (1)ـی پشتبەستوو بە ماددەی (17)ـی یاسای باری شارستانی، بڕیاریدا ڕۆژی 1-7 وەک ڕێککەوتی لەدایکبوون دیاری بکات، چونکە ئەو ڕێکەوتە ناوەڕاستی  ساڵە.

 

ئەوەی پێویستە بیزانیت: ئەگەر ئێستا منداڵێک ڕێککەوتی لەدایکبوونی نەزانرێت، کاتێک ناوی تۆمار دەکرێت بۆ دەرکردنی ناسنامە، لە ڕەگەزنامەی باری شارستانی بەپێی ڕێنماییەکان داوای (حوجە ولادە یان بەیان ولادە)ـی منداڵەکە دەکرێت، ئەگەر نەیبوو، کەیسەکەی دەنێردرێت بۆ دادگا و بە فەرمی داوایەک پێشکەش دەکرێت تا ڕۆژێکی بۆ دیاری بکرێت، تەنانەت دەتوانێت لەسەر خواستی دایک و باوکی منداڵەکە ڕۆژێکی بۆ دابنرێت.

 

لەلایەکی دیکەوە: ئەمڕۆ 1-7 ژمارەیەکی زۆری فەرمانبەران خانەنشین دەبن، سەرچاوەیەک لە بەڕێوەبەرایەتیی گشتیی خانەنشینیی هەرێمی کوردستان بە ئاڤا میدیای وت، لە بەڕێوەبەرایەتی خانەنشینی مامەڵەی نزیکەی حەوت هەزار کەس ماوە تەواو بکرێت، بەشی هەرە زۆریان ڕێککەوتی لەدایکبوونیان 1-7 بووە، بۆیە وا بڕیارە ئەگەر زوو مامەڵەکانیان تەواو بکرێت بۆ بەڕێوەبەرایەتی گشتی خانەنشینی بنێردرێت، بە زوویی هەموو ڕێکارەکانیان بۆ تەواو دەکرێت.