لێکۆڵینەوە لە درۆنەکە بۆمبڕێژکراوەکەی زاخۆ دەستی پێکردووە

ئاڤا نیوز

 

درەنگانی شەوی ڕابردوو درۆنێکی بۆمبڕێژکراو لە کەمپی دەرکار لە سنووری زاخۆ کەوتە خوارەوە و لێکۆڵینەوەکانیش لەوبارەیەوە دەستیان پێکردووە.

 

چیرۆکی سەرەکی: کاتژمێر 12:30 شەو لە کەمپی دەرکاری سەربە ئیدارەی سەربەخۆی زاخۆ درۆنێکی بۆمبڕێژکراو لە قوتابخانەی کەمپەکە کەوتە خوارەوە.

 

لێدوانی فەرمی: جەهوەر محەممەد، بەڕێوەبەری ناحیەی دەرکار بە ئاڤا میدیای گوت: درۆنەکە بەر قوتابخانەی کەمپەکە کەوت، بەهۆیەوە ئاگر لە بەشێکی قوتابخانەکە کەوتەوە بەڵام توانرا زوو کۆنتڕۆڵ بکرێت. بەهۆی ‌هێرشەکەوە گەنجێکی تەمەن 16 ساڵ بە سووکی بریندار بوو و دەستبەجێ ڕەوانەی نەخۆشخانە کرا و ئێستا باری تەندروستی جێگیرە.

 

بە گوتەی بەڕێوەبەری ناحیەی دەرکار، هێزە ئەمنییەکان دەستیان بە  لێکۆڵینەوە لە ڕووداوەکە کردووە.

 

لەلایەکی دیکەوە: دژەتیرۆری کوردستان لە ڕاگەیێنراوێکدا بڵاویکردەوە: بە گوێرەی زانیارییەکانی دژەتیرۆری کوردستان، بەرەبەیانیی ئەمڕۆ سێشەممە 1ی تەممووزی 2025، کاتژمێر 00:30 درۆنێکی بۆمبڕێژکراو لە کەمپی دەرکار لە سنووری ناحیەی دەرکاری سەر بە ئیدارەی سەربەخۆی زاخۆ کەوتە خوارەوە، خۆشبەختانە جگە لە زیانی ماددی، هیچ زیانێکی گیانیی لێ نەکەوتەوە.

 

ئەمەش بزانە: کەمپی دەرکار تایبەتە بە ئاوارە ئێزدییەکان، پێشتر نزیکەی 700 خێزانی تێدا نیشتەجێبوون، ژمارەیەکیان گەڕاونەتەوە زێدی خۆیان و ئێستا نزیکەی 300 خێزان لەو کەمپە دەژین.