پۆلیسی سلێمانی دەستگیرکردنی سێ تۆمەتباری دزیکردنێکی ڕاگەیاند

ئاڤا نیوز

 

لە قەزای سەیدسادق، سێ کەس دزیان لە ماڵی هاونیشتمانییەک کردووە و بەو پارەیەی دزیویانە دوو ئۆتۆمبێلیان پێ کڕیووە. دوای تۆمارکردنی سکاڵا، مەفرەزەیەکی نوسینگەی نەهێشتنی تاوانی سەیدسادق هەر سێ تۆمەتبارەکە دەستگیر دەکەن.

 

لێدوانی فەرمی: سەرکەوت ئەحمەد، وتەبێژی پۆلیسی سلێمانی بە ئاڤا میدیای ڕاگەیاند، لەم ماوەیە سکاڵای هاونیشتمانییەکمان بە دەست گەیشت، بەوتەی سکاڵاکار 50 ملیۆن دیناری عێراقی و دوو دەفتەر و 25 وەرەقەی لێ دزراوە. دوای لێکۆڵینەوەی پۆلیس دەرکەوت سێ کەس چوونەتە ماڵەکە و پارەکەیان دزیووە، بە پارە دزراوەکە دوو ئۆتۆمبێلی جۆری لیکسوس و مەلیکەیان پێ کڕیووە. 

 

زانیاریی زیاتر: بە وتەی سەرکەوت ئەحمەد، تۆمەتبارەکان خەڵکی ناوچەکەن، بەناوەکانی (ش، س،ع)  (ر،م،أ)  (م،ج،ن)  لە کاتی دەستگیرکردنیان دوو دەمانچەشیان لابووە، ئەمە جگە لەوەی بەشێک لەو پارەیەش ماوەتەوە کە دزیبوویان و لەو کاتە لایان بووە.