عێراقچی: گەرەنتیمان دەوێت لەکاتی دانوستاندن هێرشمان ناکرێتە سەر

ئاڤا نیوز

 

وەزیری دەرەوەی ئێران لەبارەی دانوستاندنەکانی نێوان وڵاتەکەی و ئەمریکا دەڵێت، جارێ بەم نزیکانە دانوستاندن ناکەین.

 

وێنە گەورەکە: دوای هێرشە ئاسمانییەکەی ئەمریکا بۆ سەر وێستگە ئەتۆمییەکانی ئێران، ئەمریکا چەند جارێك داوای کرد دانوستاندنی ڕاستەوخۆ لەگەڵ لایەنی ئێرانی ئەنجام بدەنەوە و هەنگاوی دیپلۆماسی بنێن بۆ چارەسەرکردنی بەرنامەی ئەتۆمی تاران.

 

لێدوانی فەرمی: عەباس عێراقچی، وەزیری دەرەوەی ئێران لە چاوپێکەوتنێکدا لەگەڵ کەناڵی سی بی ئێس ڕایگەیاند: ''هەرگیز دەرگای دیپلۆماسی لەگەڵ واشنتن داناخەین، بەڵام بەمزووانە دانوستاندەکان دەستپێناکەینەوە".

 

عێراقچی ئاماژەی بەوەشکرد، گەڕانەوە بۆ سەر مێزی دانوستاندن پێویستی بە گەرەنتییەکی ڕوون هەیە کە ئێران لە کاتی دانوستانەکاندا جارێکی دیکە نەکرێتە ئامانج.

 

هەرچی پەیوەستە بە بەرنامە ئەتۆمییەکەی وڵاتەکەی، عێراقچی گوتی، "تەکنۆلۆژیا و زانستی ئەتۆمی بە بۆردوومان لەناو ناچێت، بەرنامەی ئەتۆمی ئێران بە تەواوی ئاشتیخوازانەیە و جێگای شانازییە بۆ گەلی ئێران".