بڕیارێکی ئێران قەیرانی کارەبا لە عێراق دروست دەکات

ئاڤا نیوز

 

لە ماوەی چەند کاتژمێری ڕابردوودا ئێران هەناردەی گازی شلی بۆ وێستگەکانی کارەبای عێراق بە ڕێژەی زیاتر لە 50% کەم کردووەتەوە، ئەوەش توانای عێراقی بۆ بەرهەمهێنانی کارەبا بە بڕی نزیکەی چوار هەزار مێگاوات کەم کردەوە.

 

چیرۆکی سەرەکی: بەشێکی سەرەکی دابینکردنی کارەبا لە عێراق پشتی بەو گازە بەستووە کە لە ئێرانەوە هاوردە دەکرێت و بڕەکەی ڕۆژانە 55 ملیۆن مەتر سێجایە، بەڵام چەند کاتژمێرێکە ئێران بڕەکەی بۆ 25 ملیۆن مەتر سێجا کەم کردووەتەوە.

 

ڕاگەیێنراوی فەرمی: وەزارەتی کارەبای عێراق بڵاویکردەوە، بڕیارەکەی ئێران وایکردووە توانای عێراق بۆ بەرهەمهێنانی کارەبا بە بڕی سێ هەزار و 800 مێگاوات کەم ببێتەوە و بەشێک لە وێستەکانی کارەباش لە بەرهەمهێنان وەستاون، بۆیە وەک ڕێکارێکی کاتی هەوڵ دەدەن وێستگەکان بە "زەیتی گاز" بەگەڕ بخەنەوە، بەوەش هەوڵ دەدەن لەم وەرزی گەرمایە زۆرترین بڕی کارەبا بۆ هاووڵاتیان دابین بکەن.