سوودانی هۆشداری لە ڕووخاندنی دەسەڵات لە ئێران دەدات: کاردانەوەی مەترسیداری دەبێت

ئاڤا نیوز

 

سەرۆکوەزیرانی عێراق دەڵێت، ئەرکی هاوپەیمانیی نێودەوڵەتیی دژی داعش لە عێراق، لە ئەیلولی ساڵی 2026 کۆتایی دێت و پەیوەندییەکانیان لەگەڵ ئەمریکا بۆ پەیوەندی ئەمنیی دوو قۆڵی دەگۆڕن، جەختیش دەکاتەوە کە هەر هەوڵێک بۆ ڕووخاندنی دەسەڵات لە ئێران کاردانەوەی مەترسیداری بۆ کۆی ناوچەکە دەبێت.

 

وێنە گەورەکە: لە 12 ڕۆژی جەنگی نێوان ئیسرائیل و ئێران لە حوزەیرانی ئەمساڵدا، عێراق خۆی لە بەشداریی جەنگەکە بەدوورگرت و ڕێگری لە گرووپە چەکدارەکانی نزیک لە ئێرانیش کرد بۆ پشتیووانی تاران هەنگاوبنێن، بەوەش عێراق نەبووە ئامانج لە جەنگەدا بەڵام زیانی ئابووری بەهۆی ڕاگیرانی گەشتە ئاسمانییەکان بەرکەوت.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە چاوپێککەوتنێکدا لەگەڵ کەناڵی بی بی سی ئینگلیزی ئاماژەی بەوەشکرد، لە کێشەکانی ناوچەکەدا عێراق هەوڵی هێورکردنەوەی دۆخەکە دەدات، چونکە هەمیشە دۆخی گرژیی کاریگەریی لەسەر ئارامیی و ئاسایشی وزە دەبێت، بۆ پاراستنی ئاسمانی وڵاتیش لە داهاتوودا ژمارەیەک گرێبەستی سەربازیی واژۆ دەکەن.

 

ئاماژەی بەوەشکردووە، بەغدا پەیوەندییەکی باشی لەگەڵ تاران و واشنتن هەیە و هەردوولاش لە گرنگی پاراستنی ئارامیی عێراق تێدەگەن، بۆیە هەوڵ دەدەن عێراق نەخرێتەناو هیچ گرژییەکەوە، کارکردنیش بۆ ڕووخاندنی دەسەڵات لە ئێران کاریگەری مەترسیداری لەسەر هەموو ناوچەکە دەبێت.