لە ڕووداوێکی هاتووچۆدا لە ڕێگەی خانەقین - گوڵاڵە چوار کەس گیانیان لەدەست دا

ئاڤا نیوز

 

بەهۆی ڕووداوێکی سەختی هاتووچۆ لە ڕێگەی گوڵاڵە چوار کەس گیانیان لەدەست دا، بەڕێوەبەری هاتووچۆی گەرمیانیش دەڵێت، "بەهۆی ڕووداوەکەوە یەکێک لە ئۆتۆمبێلەکان تەقیوەتەوە بۆیە ئەو چوار کەسە گیانیان لەدەست داوە'.

 

چیرۆکی سەرەکی: سەرلەبەیانیی ئەمڕۆ چوارشەممە لەسەر ڕێگەی جەلەولا-خانەقین کە بە گوڵاڵە ناسراوە، ڕووداوێکی هاتووچۆ لەنێوان دوو ئۆتۆمبێل ڕوویدا و بەوهۆیەوە چوار هاووڵاتی گیانیان لەدەست دا.

 

لێدوانی فەرمی: عەمید موحسین مەنسوور، بەڕێوەبەری هاتووچۆی گەرمیان بە ئاڤا میدیای ڕاگەیاند: ئەو ڕووداوە لە سنووری دیالە ڕوویداوە، بەگوێرەی ئەو زانیاریانە لە هاتووچۆی سنوورەکە وەرمانگرتووە، ڕووداوەکە لەنێوان ئۆتۆمبێلێکی جۆری مارسیدزی کۆن و ئۆتۆمبێلێکی سیراتۆن ڕوویداوە.

 

-ئەو ئۆتۆمبێلەی لە جۆری مارسیدز بووە، سیستمی بەنزینی بۆ غاز گۆڕیوە و تەنکییەکی غاز لە سندووقەکەیدا بووە، بۆیە کاتێک ڕووداوەکە ڕوویداوە مارسیدزەکە تەقیوەتەوە.

 

- بەهۆیەوە هەردوو شۆفێرەکە و ژن و منداڵێک - کە لەناو ئۆتۆمبێلی جۆری سیراتۆکەدا بوون- گیانیان لەدەست داوە، هەروەها منداڵێکیش بریندار بووە و دۆخی تەندروستی ناجێگیرە.