پەککەوتنی پەرلەمان چارەنووسی 100 پرۆژەیاسا بۆ خولی داهاتوو دوادەخات

ئاڤا نیوز

ئەندامێکی لیژنەی یاسایی لە پەرلەمانی عێراق ڕایدەگەیێنێت، 100 پرۆژەیاسا لە پەرلەماندا پەکخراون کە یاساکانی دادگای فیدراڵی، نەوت و گاز و خزمەتی گشتیی فیدراڵی لە دیارترینیانن.

لێدوانی فەرمی: عەبدولکەریم عەبتان، ئەندامی لیژنەی یاسایی پەرلەمان بە میدیای عێراقی ڕاگەیاند، "زیاتر لە 100 یاسای پەککەوتوو لە ئەنجوومەنی نوێنەراندا خراونەتە سەر ڕەفەکان، لە گرنگترین ئەم یاسایانە، یاساکانی دادگای فیدراڵی، نەوت و گاز، خزمەتی سەربازی (ئاڵا) و خزمەتی فیدراڵین".

ئەوەی ئێستا ڕوودەدات: بە گوتەی عەبتان، "ئەنجوومەنی نوێنەران بەهۆی کێشە و ململانێ سیاسییەکانەوە تووشی ئیفلیجی بووە و توانای بەستنی دانیشتنەکانی نەماوە"، ڕوونیشی کردەوە "زۆربەی ئەو پرۆژەیاسایانەی لە لیژنەکاندا کەڵەکە بوون، بەهۆی ململانێ سیاسییەکان و پەککەوتنی پەرلەمانەوە، چارەنووسیان دەکەوێتە خولی داهاتووی پەرلەمان".

ئەوەی لەوبارەیەوە دەگوترێت: پێشتریش موختار موسەوی، ئەندامی لیژنەی پەیوەندییەکانی دەرەوەی پەرلەمان، ئاشکرای کردبوو کە ناکۆکییەکانی نێوان کوتلە سیاسییە بەشداربووەکانی حکومەت، هۆکاری پەکخستنی کاری ئەنجوومەنی نوێنەرانن و ئاماژەی بەوەش کردبوو کە ئەم ناکۆکییانە بوونەتە ڕێگر لەبەردەم دەنگدان لەسەر چەندین بڕیاری گرنگ، دیارترینیان یاسای بودجەی فیدراڵی و یاسای حەشدی شەعبییە.