پڕۆژەی فریاگوزاریی خێرای ئاوی هەولێر قۆناغێكی دیكەی گرنگ دەبڕێت

ئاڤا نیوز

كاركردن لە پڕۆژەی فریاگوزاریی خێرای ئاوی هەولێر بەردەوامە و قۆناغێكی دیكەی گرنگی بڕی و ئاو بۆ نێو وێستگەی پاڵاوتنی پڕۆژەكە بەردرایەوە.

وێنە گەورەكە: پڕۆژەی فریاگوزاریی خێرای ئاوی هەولێر یەکێکە لە پڕۆژە ستراتیژیەکانی کابینەی نۆیەم، ئامانج لێی ئەوەیە تا 30 ساڵی داهاتوو شاری هەولێر کێشەی ئاوی خواردنەوەی نەمێنێت و بڕیارە بە تەواو بوونی هەزار بیری ئاوی خواردنەوە بە یەکجاری دابخرێن.

لێدوانی فەرمی: ئاری ئەحمەد، بەڕێوەبەری گشتیی ئاوی هەرێمی كوردستان بە ئاڤا میدیای ڕاگەیاند: ئێستا دەست كراوە بە تاقیكردنەوەی پەمپەكانی ئاو، لە ڕووی كارەباییەوە هەموو كارەكان تەواو بوونە و وزە دراوەتە پەمپەكان، ئێستا یەك پەمپ (غەتاس) دەستی بەكار كردووە و تاقی دەكرێتەوە، ئاو بۆ نێو وێستگەی پاڵاوتنی ئاوی پڕۆژەكە بەردراوەتەوە.

ئێستا ئینتەیكی پڕۆژەكە ئامادەیە و ئاوەكە بەردراوەتەوە و دووریی نێوان ئینتەیك بۆ وێستگەی پاڵاوتنی پڕۆژەكە نزیكەی نۆ كیلۆمەترە، ڕەنگە تاوەكوو بەرەبەیان ئاوەكە بگاتە وێستگەكە، ئەمەش بۆ دڵنیابوونەوە لە تەواو كاركردنی ئەو بەشەی پڕۆژەكە.

ئەوەی پێویستە بیزانیت: بەپێی گوتەی بەڕێوەبەری گشتیی ئاوی هەرێمی كوردستان ئێستا زیاتر لە 80%ـی پڕۆژەكە تەواو بووە و لە 15 تاوەكوو كۆتایی ئەم مانگە ئاو دەگاتە ماڵان، لە قۆناغی یەكەمدا نزیكەی 35 گەڕەكی شاری هەولێر كە دەكەونە دەرەوەی شەقامی 120 مەتری سوودمەند دەبن و تاوەكوو كۆتایی ئەمساڵ 100%ـی پڕۆژەكە تەواو دەبێت.