عێراقچی: هیچ کەس نازانێت بە دیاریکراوی وێستگەی فۆردۆ چی لێهاتووە

ئاڤا نیوز

وەزیری دەرەوەی ئێڕان لە یەکەم چاوپێکەوتنی تەلەڤیزیۆنیدا لە دوای جەنگی نێوان وڵاتەکەی و ئیسرائیل ئاماژە بە هێرشەکانی ئەمریکا بۆ سەر وێستگە ئەتۆمییەکانی ئێران دەکات و دەڵێت تا ئێستا کەس نازانێت پێگەی فۆردۆ چی لێهاتووە.

وێنە گەورەکە: لە " جەنگی 12 ڕۆژە "ـی نێوان ئیسرائیل و ئێران، هێزی ئاسمانی ئەمریکا لە هێرشێكدا بۆ سەر ئێران بەشداربوو، دۆناڵد ترەمپ، سەرۆکی ئەمریکا بە شێوەیەکی فەرمی و ڕاستەوخۆ هێرشی ئەمریکای بۆ سەر وێستگە ئەتۆمییەکانی ئێران فۆردۆ، نەتەنز و ئەسفەهان ڕاگەیاند و بە کۆتایی بەرنامەی ئەتۆمی ئێران ناوی برد.

لێدوانی فەرمی: عەباس عێراقچی، وەزیری دەرەوەی ئێران لە چاوپێکەوتنێکی تەلەڤیزیۆنیدا لەگەڵ کەناڵی CBS سەبارەت بە وێستگەی ئەتۆمی فۆردۆ گوتی: هیچ کەس نازانێت بە دیاریکراوی لە فۆردۆ چی ڕوویداوە، ئەوەی ئێمە تا ئێستا دەیزانین ئەوەیە کە وێستگە ئەتۆمییەکان بە تووندی و قورسی زیانیان بەرکەوتووە، ئاژانسی وزەی ئەتۆمی ئێران لە دوایین قۆناغدا دەستی کردووە بە هەڵسەنگاندنی زەرەر و زیانەکان و دواتر ڕاپۆرتەکان پێشکەش بە حکومەت دەکرێت.

زانیاریی زیاتر: عەباس عێراقچی سەبارەت بە هەوڵی ئێران بۆ دۆزینەوەی ڕێگەیەک بۆ گەشتن بە قووڵایی فۆردۆ، ئەو دەنگۆیانەی ڕەتنەکردەوە و گوتی: ئەمە پرسیارێکە کە دەبێت ئاژانسی وزەی ئەتۆمی ئێران وەڵامی بداتەوە، چونکە ئەوان ئێستا سەرقاڵی لێکۆڵینەوە و هەڵسەنگاندنن.