پرسی دامەزراندنی سێ یەکەمەکانی كوردستان بە کوێ گەیشت؟

ئاڤا نیوز

ئەنجوومەنی وەزیرانی هەرێمی کوردستان لە هەوڵدایە بۆ ئەوەی سێ یەکەمەکەی سەر ئاستی زانکۆ و پەیمانگەکان دابمەزرێن، بەرپرسێکی وەزارەتی خوێندنی باڵاش دەڵێت 'دەبێت بەغدا 10 ملیار دینار بۆ دامەزراندنیان تەرخان بکات'.

چیرۆکی سەرەکی: قوتابیانی دەرچووی ساڵانی 2017 تا 2024، کە پلەی یەکەم و دووەم و سێیەمی سەر ئاستی زانکۆ و پەیمانگەکانیان بەدەست هێناوە ژمارەیان نزیکەی 15 هەزار کەس دەبێت، تاوەکو ئێستا دانەمەزراون.

لێدوانی فەرمی: د. توانا نەجەف، سەرۆکی دیوان و بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی بە ئاڤا میدیای ڕاگەیاند: نووسراومان بۆ ئەنجوومەنی وەزیران لەبارەی دامەزراندنی سێ یەکەمەکانەوە کردووە، بابەتەکە چووەتە بەرنامەی کاری ئەنجوومەنی وەزیرانەوە.

د. توانا نەجەف ئەمانەشی بە ئاڤا وت:

کاتێک بابەتێک دەچێتە بەرنامەی کار، واتا سەرۆکوەزیران دایناوە، بڕیار دراوە ئەنجوومەنی ڕاژە و وەزارەتی دارایی لەسەر هێڵ بن، بۆ ئەوەی لە بەغدا کار لەسەر پرسی دامەزراندنیان بکرێت.

ئەنجوومەنی وەزیرانی هەرێمی کوردستان لە هەوڵدایە بە هەماهەنگی لەگەڵ لایەنە پەیوەندیدارەکان لە بەغدا ئەم بابەتە چارەسەر بکەن.

بۆ دامەزراندنی سێ یەکەمەکانی زانکۆ و پەیمانگەکان پێویستمان بە 10 ملیار دینار دەبێت، پێویستە بەغدا دابینی بکات.

سێ یەکەمەکان ژمارەیان نزیکەی 15 هەزار کەس دەبێت، کە دەرچووی ساڵانی 2017 تا 2024ـن.