بانگدانی ناوەندی دەكرێتە پڕۆژەیەكی سەرتاسەری

ئاڤا نیوز

پڕۆژەی بانگدانی ناوەندی، دەكرێتە پڕۆژەیەكی سەرتاسەری و لە ئاییندەیەكی نزیكدا سەرجەم مزگەوتەكانی هەرێمی كوردستان دەگرێتەوە.

چیرۆكی سەرەكی: ئەمڕۆ چوارشەممە 2ـی تەمموزی 2025، د. پشتیوان سادق، وەزیری ئەوقاف و کاروباری ئاینیی هەرێمی كوردستان، بە بەشداری سەرۆکی یەکێتیی زانایانی ئایینی ئیسلام، لەگەڵ بانگبێژانی گرووپی بانگی ناوەندی ھەولێر کۆبووەوە، لە كۆبوونەوەكە گفتوگۆ كرا لەبارەی چۆنیەتی بەڕێوەچوونی كاروباری گرووپەكە و بەرەوپێشبردن و فراوانكردنی پڕۆژەكە لە ئاییندەدا.

لێدوانی فەرمی: د. پشتیوان سادق، وەزیری ئەوقاف و کاروباری ئاینیی ڕایگەیاند، "ئامانجی سەرەکیمان پشتیوانیکردنی پڕۆژەی بانگدانی ناوەندی و مامۆستایانی دەنگخۆشە لەپێناو بەردەوامیدان بە پڕۆسەكە، كە ئێستا پێشوازییەكی ئەرێنی و زۆر باشی خەڵكی لێ دەكرێت."

ئەوەی پێویستە بیزانیت: ئێستا لە هەزار و 200 مزگەوتی پارێزگای هەولێر و بەشێك لە مزگەوتەكانی پارێزگای دهۆك و ئیدارەی سەربەخۆی زاخۆ، بانگدان بۆ نوێژە فەرزەكان لەڕێگەی ئامێری ئەلیكترۆنییە، لە ئاییندەیەكی نزیکدا سەرجەم مزگەوتەكانی هەرێمی كوردستان دەگرێتەوە، بەجۆرێك ژمارەیەك بانگبێژی دەنگخۆش دیاریكراون و لە مزگەوتی سەواف لە شاری هەولێر بانگ دەدەن و لەڕێگەی هێڵەكانی ئینتەرنێتەوە لەسەرجەم مزگەوتەكان پەخش دەكرێت.

پەیوەست بەم بابەتە: وەزارەتی ئەوقاف و كاروباری ئایینی لەچوارچێوەی ڕێكخستنەوەی بانگدان، لە سەرەتای مانگی حوزەیرانی ڕابردوو، دوو ناوەندی بانگبێژانی لە شارەكانی هەولێر و  دهۆك كردەوە، لەو ناوەندانە ژمارەیەك بانگبێژی دەنگخۆش لە كاتی نوێژە فەرزەكان بانگدەدەن و لەڕێگەی فریكوێنسەوە دەگوزارێتەوە بۆ مزگەوتەكانی دیكەی هەمان شار.

زانیاریی زیاتر: وەزارەتی ئەوقاف و كاروباری ئایینی، لەپێناو بەرزكردنەوەی توانای دەنگسازی، خولی ڕاهێنانی بەردەوام بۆ بانگبێژان و ئارەزوومەندانی دەنگخۆش دەكاتەوە، لەپێناو فراوانكردنی پڕۆژەی بانگدانی ناوەندی.