پڕۆژەی دووسایدی كەسنەزان - دەربەندی گۆمەسپان دەستیپێكرد

ئاری عەبدوڵڵا

کارکردن لە پڕۆژەی دووسایدی (کەسنەزان - دەربەندی گۆمەسپان) بەردەوامە، كە هاوتەریب لەگەڵ هەردوو پڕۆژەی ستراتیژی دووسایدی (گۆمەسپان-سماقووڵی) و پڕۆژەی دووسایدی (هەولێر-كۆیە) كاری تێدا دەكرێت و لە زووترین كاتدا تەواو دەكرێت.

چیرۆکی سەرەکی: لە سەر بڕیاری مەسرور بارزانی، سەرۆکى حکومەتى هەرێمى کوردستان، دەستکراوە بە کارکردن لە پڕۆژەی دووسایدی (کەسنەزان - دەربەندی گۆمەسپان) کە درێژی ڕێگاكە 15 كیلۆمەتر و 500 مەترە، 40 ئاوەڕۆ، چوار بەرزە پرد و یەك ژێرپردی لەخۆگرتووە و سەرجەمی پڕۆژەكە لەلایەن كۆمپانیای هێمن گروپەوە جێبەجێ دەكرێت.

بۆچی گرنگە: پڕۆژەكە بە پڕۆژەیەكی گرنگ و ستراتیژیی پارێزگای هەولێر دادەنرێت، بەو پێیەی سەنتەری شاری هەولێر بە ناوچەی گەشتیاریی بەنداوی گۆمەسپان دەبەستێتەوە، جگە لەوەش بە هەردوو دووسایدی هەولێر - كۆیە و گۆمەسپان - سماقووڵی بەستراوەتەوە، كە وا دەكات هاتووچۆی نێوان هەردوو پارێزگای هەولێر و سلێمانی ئاسان بێت و لەڕووی گەشتیاریی و ئابوورییەوە سوودێكی ئێجگار زۆری هەبێت و قەرەباڵغی سەر ڕێگەكە ناهێڵێت.

بابەتە ستراتیژییەکە: بە تەواوبوونی پڕۆژەی دووسایدی كەسنەزان - گۆمەسپان و تێكەڵكردنی بە هەردوو پڕۆژەی دووسایدی هەولێر - كۆیە و سماقووڵی - گۆمەسپان، سەرجەمی ڕێگەی نێوان هەردوو پارێزگای هەولێر و سلێمانی دەبێتە دوو ساید و ڕێگای هاتووچۆ ئاسانتر دەبێت.