فایلی خەڵک؛ له‌ هه‌ولێر 500 خانه‌واده‌ى شه‌هید گرفتی تاپۆنه‌كردنى زەوییەكانیان هه‌یه‌

ئاڤا نیوز

نزیكەی 500 خانەوادەی شەهید چەند ساڵێك پێش ئێستا هەر یەکەو 250 مەتر زەویی پێدراوە بەڵام تاوەكوو ئێستا لەسەریان تاپۆ نەكراوە.

چیرۆکی سەرەکی: لە ساڵی 2010، 500 خانەوادەی شەهید كە پێیان دەگوترێت خانەوادەی شەهیدانی سوپای ڕزگاری، لە گەڕەكی سەروەرانی هەولێر یەكی خانوویێكیان پێ دراوە و دواتریش یەكی زەوییەكی 250 مەترییان لە گەڕەكی باغولمنارە پێدراوە، زەوییەكان تاوەكوو ئێستا كارتن پێیان گوتراوە لەسەر تاپۆ ناكرێت.

لێدوانی فەرمی: سەربەست مەلوود، بەڕێوەبەری بەشی یاسایی لە وەزارەتی شارەوانی بە ئاڤای ڕایگەیاند: بەپێی یاسای ماف و ئیمتیازاتی شەهیدان، هەر خانەوادەیەکی شەهید زەوی یان یەکەیەکی نیشتەجێبوون وەربگرێت بە سوومەند هەژمار دەکرێت، بەڵام ئەم خانەوادانە داوایان لە ئێمە كردووە كە زەوییەکانیان تاپۆ بکرێت، بۆ ئەو مەبەستە ئێمەش نووسراومان بۆ ئەنجوومەنی وەزیران کردووە، تا ئێستا وەڵاممان بۆ نەگەڕاوەتەوە.

زانیاریی زیاتر: بە گوتەی سەربەست مەولوود، بەدواداچوونی زیاتر بۆ ئەو کێشەیە دەکەن کەی ڕەزامەندی ئەنجوومەنی وەزیران گەڕایەوە ئەو کات دەتوانن زەوییەکان لەسەر ئەو خانەوادانە تاپۆ بکەن.