فایلی خەڵک؛ جووتیارانی قەزای شێخان نیگەرانن لە هەرزانی نرخی بەروبوومەکانیان لە بازاڕ

ئاڤا نیوز

جووتیارانی دهۆک 18 هەزار دۆنم زەوییان بە پەتاتە داچاندووە و نیگەرانن لە هەرزانی نرخەکەی لە بازاڕدا.

چیرۆکی سەرەکی: جووتیارانی دەشتی ناوکوڕ لە سنوری قەزای شێخان لە پارێزگای دهۆک، ئەمساڵ 18 هەزار دۆنم زەوییان بە پەتاتە داچاندووە و چاوەڕوان دەکرێت 200 هەزار تۆن پەتاتە بەرهەمبێنن، نیگەرانن لە هەرزانی نرخەکەی لە بازاڕ.

لێدوانی فەرمی: نەوزاد خەسرەو، یەکێک لە جووتیارەکان بە ئاڤای وت: دوای ئەو هەموو ماندوبوون و خەرجییە لەبازاڕدا کیلۆی پەتاتە لەنێوان 200 بۆ 250 دینار دەگاتە دەستی هاوڵاتیان، ئەمەش وایکردووە تێچوو زیاتر بێت لە داهات، دەشڵیت" پێداویستی ناوخۆی بازاڕمان پڕکردووەتەوە دەمانەوێت بەرهەمی زیادە بنێرینە پارێزگاکانی ناوەڕاست و باشوری عێراق، بەڵام لە بازگەکانی عێراق ڕێگریمان لێ دەکەن.

بۆچوونی لایەنی بەرامبەر: نەجمەدین عەبدوڵڵا، بەڕێوەبەری کشتوکاڵی قەزای شێخان بە ئاڤای گوت: ئاگاداری گرفتی جووتیارەکانین، بەردەوامین لە پشتگیرییان، گرفتەکەش زیاتر لەوە دروستبووە هەموویان بەیەکەوە دەستیان بە هەڵکەندنی پەتاتە کردووە و خستوویانەتە بازاڕەوە، بازگەکانی عێراقیش ڕێگری دەکەن لە هەناردەکردنی بەرهەمی جووتیارانی ئێمە.