زاخۆ و شارێكی بەناوبانگی ئەمریكا بوونە دەستەخوشک

ئاڤا نیوز

لە هەنگاوێكی مێژووییدا؛ سەرپەرشتیاری ئیدارەی زاخۆ و حاكمی ویلایەتی مینیسۆتا لە ئەمریكا، یاداشتی دەستەخوشكی 'زاخۆ' و 'مۆرهێد'ـیان واژۆ كرد و ئەو دوو شارە بە فەرمی بوونە دەستەخوشك.

چیرۆكی سەرەكی: گۆهدار شێخۆ، سەرپەرشتیاری ئیدارەی سەربەخۆی زاخۆ، بە سەردانێكی فەرمی لە ئەمریكایە، لە میانی سەردانەكەیدا، جگە لە كۆبوونەوەی لەگەڵ نوێنەرایەتیی حكومەتی هەرێمی كوردستان لە واشنتن، ژمارەیەك دیدار و كۆبوونەوەی لەگەڵ بەرپرسانی ئەمریكا ئەنجامدا، دیداری لەگەڵ ڕۆب كوپێك، سێناتۆری ئەنجوومەنی پیرانی ئەمریكا و نوێنەری ویلایەتی مینیسۆتا بەرهەمدار بوو، بەو پێیەی یاداشتی دەستەخوشكی هەردوو شاری زاخۆ و مۆرهێدی لێ بەرهەم هات.

چی ڕوویدا: كەمێك لەمەوبەر، گۆهدار شێخۆ، سەرپەرشتیاری ئیدارەی سەربەخۆی زاخۆ و شێللی کارلسۆن، پارێزگاری مینیسۆتا، واژۆیان لەسەر بوون بە دەستەخوشکی هەردوو شاری زاخۆ و شاری مۆرهێد كرد.

لێدوانی فەرمی: گۆهدار شێخۆ، سەرپەرشتیاری ئیدارەی سەربەخۆی زاخۆ لە ئەمریكاوە تایبەت بە ئاڤا ڕایگەیاند، لە كۆبوونەوەمان لەگەڵ بەرپرسانی ویلایەتی مینیسۆتا، باسمان لە ئەزموونی هەرێمی كوردستان و ئەو پێشكەوتنانەی بەدیهاتوون كرد، بە تایبەتی ئەو پڕۆژە گەشتیارییانەی لە زاخۆ جێبەجێ كراون.

ڕوونیشی كردەوە، وێڕای ئەوەی بەرپرسانی ویلایەتی مینیسۆتا پاڵپشتی خۆیان بۆ هەرێمی كوردستان دووپات كردەوە، بەخۆشحاڵییەوە ڕەزامەندییان دەربڕی لەسەر واژۆكردنی یاداشتی بەدەستەخوشكبوونی هەردوو شاری زاخۆ و مۆرهێد، لەو چوارچێوەیەشدا، شاندێكی باڵای ویلایەتی مینیسۆتا لە ئاییندەیەكی نزیكدا سەردانی هەرێمی كوردستان دەکات.

بۆچی گرنگە: بەگوێرەی یاداشتەكە، هەردوو شار هەماهەنگی لە بوارەكانی كشتوكاڵ، گەشتوگوزار، ئاڵوگۆڕی خوێندن لە زانكۆكان دەكەن و سوود لە ئەزموونی یەكتر وەردەگرن.

ئەوەی پێویستە بیزانیت: هەردوو شاری زاخۆ و مۆرهێد لەڕووی هەڵكەوتەی جوگرافی و پێكهاتەی جیۆلۆجییەوە خاڵی هاوبەش و لێكچوویان هەیە، بەو پێیەی هەردوو شار ڕووبارێك بەناویاندا ڕەت دەبێت و لەڕووی بایەخی گەشتیاریشەوە؛ هەروەك چۆن زاخۆ بووەتە ڕووگەیەكی گرنگی گەشتیاری لە هەرێمی كوردستان، بەهەمان شێوەش شاری مۆرهێد لە بەشی باكووری ڕۆژهەڵاتی ویلایەتی مینیسۆتای ئەمریكا، بە ڕووگەی گەشتیاریی ویلایەتەكە دادەنرێت.