هەواڵێکی دڵخۆشکەر بۆ ئەوانەی نووسینگەی خانووبەرەیان هەیە

ئاڤا نیوز

لە پێناو ئاسانکاریکردن بۆ کۆمپانیا و نووسینگەکانی تایبەت بە خانووبەرە، ژووری بازرگانیی هەولێر شێوازی پاکتاوکردنی دارایی بۆ ئەو دووکانانە دەگۆڕیت کە نووسینگەکانی خانووبەرە بە کرێیان دەگرن.

وێنە گەورەکە: بە هۆکاری کەڵەکەبوونی قەرز یان گرفت لە باج و کەڵەکەبوونی باج لەسەر هەر باڵەخانەیەک، ساڵانی ڕابردوو نەدەتوانرا ڕاستاندن بۆ گرێبەستی نووسینگەکانی خانووبەرە بکرێت لە باڵەخانەکاندا، دەبووایە خاوەن موڵکەکان گشت باجەکانی سەر باڵەخانەکانیان بدەن، بەڵام ئێستا تەنها باجی ئەو شوێنە دەدات کە دەدرێت بە کرێ.

لێدوانی فەرمی: کاروان سوورچی، وتەبێژی یەکێتیی ژوورەکانی بازرگانی و پیشەسازیی هەرێمی کوردستان بە ئاڤای ڕاگەیاند: ئەگەر کەسێک بیەوێت نووسینگەیەکی خانووبەرە دابنێت و ئۆفیسەکەی لە دووکانێکدا بکاتەوە کە بە کرێی گرتووە، پێویست ناکات پاکتاوی باج بۆ تەواوی باڵەخانەکە بکات، تەنها بۆ ئەو دووکانەی دەکات بە کرێ گرتووە.

زانیاریی زیاتر: بۆ نموونە باڵەخانەیەک هەشت دووکانی هەیە، کاتێک نووسینگەیەکی خانووبەرە یەکێک لە دووکانەکان بە کرێ دەگرێت، پێویست ناکات باجی سەر هەموو دووکانەکان و باڵەخانەکەش پاکتاو بکات، بەڵکو تەنیا پاکتاوی باج بۆ ئەو دووکانە دەکات کە بەکاری دەهێنێت.