بەدواداچوونی ئاڤا؛ ئاگاداربن ئەم فێڵەتان لێ نەکرێت

ئاڤا نیوز

کەسانێک فێربوونە، ئۆتۆمبێل لە پێشانگای ئۆتۆمبێلی کۆنە یان لەدەست ئۆتۆمبێلی کۆن و خراپ دەکڕن بە نرخێکی هەرزان، و لەسەر شەقام یان شوێنە گشتیەکان دەیسوتێنن بۆ ئەوەی پارەی پێ کۆبکەنەوە. قایمقامی هەولێریش دەڵێت، بەردەوام بەدواداچوونی وورد لەلایەن هێزە ئەمنیەکانەوە بۆ ئەم کارە دەکرێت.

بەدواداچوونی ئاڤا: هیشام سەعید، پەیامنێری ئاڤا قسەی لەگەڵ ئاوات وەتمان کردووە کە کاری کڕین و فرۆشتنی ئۆتۆمبێل دەکات، ئەو دەڵێت: بەڵێ ئەم کارە دەکرێت، چونکە ئەو ئۆتۆمبێلانەی لێرەن نرخەکانیان هەرزانە بەنموونە لە 300 هەزارەوە هەیە تا دوو ملیۆن، خەڵکە هەیە زانیومانە هاتووە لێرە کڕیویەتی و چووە ئەم کارەی پێ کردووە.

زانیاریی زیاتر: بە گوتەی ئاوات وەتمان، وادەکەن فیتپەمپ شۆرتی لێ دروست بێت، یان شۆرت لە دینەمۆ و پاتری ئۆتۆمبێلەکان دروست دەکەن و گڕ دەگرێت، ئینجا دواتر پارەی پێ کۆدەکەنەوە، بەنموونە خەڵک هەیە بە نزیکەی 300 هەزار کڕیویەتی توانیویەتی ملیۆن و نیو بۆ دوو ملیۆنی پێ کۆبکاتەوە لەسەر شەقامەکان.

لەلایەکی دیکەوە: شۆفێر هەبووە ئاوا ئۆتۆمبێلێکی هەرزانی کڕیوە، بەنزینی لە بەنزینخانەیەک تێکردووە، و دواتر ئاوا چەرخی لە بۆنیتی پێشەوە داوە و ئۆتۆمبێلەکەی سووتاندووە، دواتریش داوای پارەی ئۆتۆمبێلەکەی یان ئۆتۆمبێلێکی نوێی لە خاوەن بەنزینخانەکە کردووەتەوە بە بیانووی ئەوەی بەنزینەکە خراپ بووە بەنزینەکە هۆکاری سووتانەکە بووە.

ژمارەکان وادەڵێن: بە پێی ئامارەکانی بەرگریی شارستانیی هەولێر، لە شەش مانگی سەرەتای ئەمساڵدا 109 ئۆتۆمبێل بە هۆکاری جیاواز سووتاون.

لێدوانی فەرمی: نەبەز عەبدولحەمید، قایمقامی هەولێر بە ئاڤای ڕاگەیاند: بەردەوام بەدواداچوونی وورد لەلایەن هێزە ئەمنیەکانەوە بۆ ئەم کارە دەکرێت، و سزای تووندیش بەسەر  ئەو کەسانە دەسەپێندرێت کە ئاوا فێڵ لە هاونیشتمانیان دەکەن.