عێراق 27 بیری نەوتی نوێ هەڵدەکەنێت

ئاڤا نیوز

وەزارەتی نەوتی عێراق ڕایگەیاند کە کۆمپانیای هەڵکەندنی عێراقی لە ماوەی نیوەی یەکەمی ئەمساڵدا 27 بیری نەوتیی نوێی هەڵکەندووە و 86 بیری دیکەشی نۆژەن کردووەتەوە. ئەمەش وەک بەشێک لە پلانی وەزارەت بۆ بەرزکردنەوەی ئاستی بەرهەمهێنان و کارایی کێڵگە نەوتییەکان.

بۆچی گرنگە: ئەم هەنگاوە ڕاستەوخۆ توانای بەرهەمهێنانی نەوتی عێراق زیاد دەکات، کە ئەمەش دەبێتە هۆی بەرزبوونەوەی داهاتی نیشتمانی و پتەوکردنی پێگەی وڵات لە بازاڕی وزەی جیهانیدا.

ڕاگەیێنراوی فەرمی: بەگوێرەی ڕاگەیێنراوی وەزارەتی نەوتی عێراق لەسەر زاری ئەندازیار حەسەن محەمەد حەسەن، بەڕێوەبەری گشتیی کۆمپانیاکە، ڕایگەیاند کە ئەم ژمارانە ڕەنگدانەوەی "پابەندبوونی تیمە نیشتمانییەکانە کە سەرەڕای ئاستەنگەکان بە کاراییەکی بەرزەوە کار دەکەن".

لە هەمان کاتدا: ناوبراو ستایشی هەوڵی تیمەکانی کرد و جەختیشی کردەوە کە ئیدارەی باڵای کۆمپانیاکە کار لەسەر پەرەپێدانی توانای کارمەندان و دابینکردنی ژینگەیەکی کاری سەلامەت دەکات بۆ گەیشتن بە باشترین ئەنجام، ئاماژەی بەوەش کرد کە کۆمپانیاکە بەردەوامە لە جێبەجێکردنی پڕۆژەکانی داهاتووی بە ئامانجی فراوانکردنی ئۆپەراسیۆنەکانی هەڵکەندن و نۆژەنکردنەوە، کە یارمەتیدەر دەبێت بۆ پشتیوانیکردنی ئابووریی نیشتمانی و خواستی کەرتی وزە لە عێراقدا.