هاتووچۆی هەولێر شۆفێران لە دانانی دوو کامێرای تۆمارکردنی تیژڕۆیی ئاگادار دەکاتەوە

ئاڤا نیوز

بەڕێوەبەرایەتیی هاتووچۆی هەولێر شۆفێران لە دانانی کامێرای چاودێری لە دوو شەقامی شارەکە ئاگادار دەکاتەوە.

وێنە گەورەکە: چەند ساڵێکە بەڕێوەبەرایەتیی هاتووچۆی هەولێر لەڕێگەی دانانی کامێراکانی تۆمارکردنی سەرپێچی و تیژڕۆیی هەوڵی کەمکردنەوەی ڕووداوەکانی هاتووچۆ و نەمانی دیاردەی تیژڕۆیی دەدات، لەم چوارچێوەیەشدا لە بەشێکی زۆری شەقامەکانی ناوەوە و دەرەوەی هەولێر کامێرای چاودێریی دانراون.

ڕاگەیێنراوی فەرمی: هاتووچۆی هەولێر ڕایگەیاند: دوو کامێرای تۆمارکردنی تیژڕۆیی لە شەقامی 40 مەتریی نزیک دریم ستی و شەقامی 100 مەتریی نزیک مزگەوتی جەودەت ئەسعەدی بەشێوەی تێست دەکەونە کار.

ئەوەی پێویستە بیزانیت: کامێراکان تاوەکو ڕێککەوتی 2025-07-10، بەشێوەی تێست کار دەکەن، دوای ئەم ڕێکەوتە سەرپێچییەکان تۆمار دەکرێن.

بۆچی گرنگە: جگە لە کەمکردنەوەی ڕووداوەکانی هاتووچۆ و پاراستنی گیانی هاووڵاتیان، دانانی کامێرای هاتووچۆ لە شەقامەکاندا سیمایەکی شارستانی بە شارەکە دەبەخشێت، چونکە ڕاستەوخۆ کۆنتڕۆڵی خێرایی شەقام دەکرێت.