سەرۆکی دادگای فیدراڵی دەستبەکار بوو و جەخت لە بێلایەنبوونی دادگا دەکاتەوە

ئاڤا نیوز

سەرۆکی نوێی دادگای باڵای فیدراڵیی عێراق، دوای سوێندخواردنی دەستووری لە بەردەم سەرۆککۆمار، پابەندبوونی خۆی بە جێبەجێکردنی دەستوور و یاسا دووپات کردەوە و جەختیش لە بێلایەنبوونی دادگا دەکاتەوە.

 

چیرۆکی سەرەکی: ئەمڕۆ پێنجشەممە، 3ـی تەمموزی 2025، لە کۆشکی بەغدا، دادوەر مونزر ئیبراهیم حوسێن، وەک سەرۆکی نوێی دادگای باڵای فیدراڵیی عێراق، لەبەردەم  د.عەبدوللـەتیف جەمال ڕەشید، سەرۆککۆماری عێراق، سوێندی دەستووریی خوارد.

وێنە گەورەکە: 30ـی مانگی ڕابردوو و دوای ڕۆژێک لە کاندیدکردنی بۆ پۆستی سەرۆکی نوێی دادگای فیدراڵی لەلایەن ئەنجوومەنی باڵای دادوەرییەوە، سەرۆکایەتی کۆماری عێراق مەرسوومی کۆماری بۆ دەستبەکاربوونی سەرۆکی نوێی دادگای فیدراڵی دەرکرد.

ڕاگەیێنراوی فەرمی: بەگوێرەی ڕاگەیێنراوی فەرمانگەی ڕاگەیاندنی سەرۆکایەتیی کۆماری عێراق، سەرۆککۆمار پیرۆزبایی لە دادوەر مونزر ئیبراهیم حوسێن کرد و هیوای سەرکەوتنی بۆ خواست لە ئەرکە نوێیەکەیدا. هەروەها پشتیوانیی تەواوی خۆی بۆ سەرخستنی ئەرکە دەستوورییەکانی دادگاکە دووپات کردەوە و جەختی لەسەر ڕۆڵی گرنگی دادگای فیدراڵی کردەوە لە پاراستنی ڕەوتی دیموکراسی، مسۆگەرکردنی جیاکردنەوەی دەسەڵاتەکان و پاراستنی سەربەخۆیی دەسەڵاتی دادوەری.

 

ئەوەی پێشبینی دەکرێت: پێشتر هاوڕێ تۆفیق، بەڕێوەبەری فەرمانگەی پەیوەندییەکان و ڕێکخراوە نێودەوڵەتییەکان لە سەرۆکایەتیی کۆمار بە ئاڤای ڕاگەیاندبوو، "دانیشتنەکانی دادگای باڵای فیدراڵی هەفتەی ئایندە دەستپێدەکەنەوە  و لەو دانیشتنەدا گفتوگۆ لەبارەی دۆسیەی مووچەی فەرمانبەرانی هەرێمی کوردستان  دەکرێت."

لە هەمان کاتدا: سەرۆککۆمار ئاماژەی بەوەشکرد کە ڕێزگرتن لە دەستوور و پابەندبوون پێوەی، بنەمایەکی سەرەکییە بۆ بوونیادنانی دەوڵەتێکی سەقامگیر و دادپەروەر کە لەسەر بنەمای سەروەریی یاسا و پاراستنی ماف و ئازادییەکان دامەزراوە.

لە بەرامبەردا: سەرۆکی نوێی دادگای باڵای فیدراڵی پابەندبوونی خۆی بە جێبەجێکردنی دەستوور و یاسا دووپات کردەوە و جەختی کردەوە لەسەر پاراستنی سەربەخۆیی دادگا و دوورخستنەوەی لە هەر دەستوەردانێک. هاوکات سوپاسی سەرۆککۆماریشی کرد بۆ جەختکردنەوەی لەسەر سەربەخۆیی دادگا، بەو پێیەی کە بەڕێزیان پارێزەری دەستوورە.