درۆنێک لە گوندی گەرمکی سنووری گەرمیان کەوتە خوارەوە

ئاڤا نیوز

لەسنووری ئیدارەی گەرمیان درۆنێک کەوتە خوارەوە و سەرچاوەیەکی باڵای ئەمنیش لەوبارەیەوە دەڵێت "تەنیا درۆنی تەنکی ئێرانی دەکەوێتە خوارەوە".

زانیاریی تایبەت: سەرچاوەیەکی باڵای ئەمنی لە ئیدارەی گەرمیان بە ئاڤا میدیای ڕاگەیاند: لەنێوان کاتژمێر 1 بۆ 2ـی پاشنیوەڕۆی ئەمڕۆ پێنجشەممە، لە دۆڵێکی نێوان گوندەکانی گەرمک و سەیدەی سەر بە ئیدارەی گەرمیان درۆنێکی بۆمبڕێژکراو کەوتەخوارەوە.

سەرچاوە ئەمنییەکە دەڵێت: بەشی دواوەی درۆنەکە تەقیوە، بەڵام بەشی پێشەوەی کە تەقینەوەی پێوەبووە نەتەقیوەتەوە، بێگومان تەنکە درۆنەکانی ئێران دەکەونە خوارەوە.

لێدوانی فەرمی: عەقید سەلام عەبدولخالق، وتەبێژی دەزگای ئاسایشی هەرێم، بە ئاڤا میدیای ڕاگەیاند: ئێمە لێکۆڵینەوە لەبارەی کەوتنەخوارەوەی ئەو درۆنە دەکەین.

لەلایەکی دیکەوە: لە ڕوونکردنەوەیەکدا دەزگای ئاسایشی هەرێمی کوردستان ڕایگەیاند، کاتژمێر 01:20 خولەکی پاشنیوەڕۆی ئەمڕۆ 2025-07-03، لە نزیک ناحیەی کۆکس لە سنووری گەرمیان درۆنێکی بۆمبڕێژکراو کەوتەخوارەوە و دەستبەجێ تیمەکانی ئاسایش گەیشتنە شوێنی ڕووداوەکە و لێکۆڵینەوەیان دەستپێکردووە و کەوتنەخوارەوەی درۆنەکە هیچ زیانێکی گیانی نەبووە.

زانیاریی زیاتر: هێزە ئەمنییەکانی سنووری ئیدارەی گەرمیان دەستیان بە لێکۆڵینەوە لە کەوتنەخوارەوەی درۆنەکە  کردووە.