جووتیارێكی كورد لە سنووری كەركووك لەلایەن چەند چەكدارێكەوە دەڕفێندرێت

ئاڤا نیوز

لە سنووری شارۆچكەی دووبزی سەر بە پارێزگای كەركووك چەند چەكدارێكی نەناسراو جووتیارێكی كورد لەكاتی كاركردن دەڕفێنن و كەسوكارەكەیشی دەڵێن هیچ گرفتێكی كۆمەڵایەتیمان نییە و هێزە ئەمنییەكانیش گومان دەكەن چەكدارەكان داعش بن.

چیرۆكی سەرەكی: شەوی ڕابردوو، جووتیارێكی كورد بە ناوی 'ئاری' لە گوندی گەڵۆزی لە سنووری كەركووك لەسەر زەوییەكەی خۆی سەرقاڵی كاركردن بووە و چەند كەسێك كە چەكدار بوونە بەرەو شوێنێكی نادیار ڕفاندوویانە.

لێدوانی فەرمی: سەرچاوەیەكی ئەمنی لە شارۆچكەی پردێ بە ئاڤا میدیای ڕاگەیاند: ژمارەیەك چەكدار كە لە دوو چەكدار زیاتر بوونە جووتیارەكەیان ڕفاندووە و بەرەبەیانی ئەمڕۆ ئۆتۆمبێلەكەی دوور لە شوێنی ڕووداوەكە دۆزراوەتەوە و چەكدارەكان تەنیا سیمكارتی مۆبایلی جووتیارەكەیان بردووە و ئۆتۆمبێلەكەیان جێهێشتووە، و گومان دەكەین چەكدارەكان داعش بن و بۆ پارە كارەكەیان كردبێت.

زانیاریی زیاتر: هێزە ئەمنییەكان لە گەڕان بەدوای جووتیارەكە بەردەوامن و تاوەكوو ئێستا بێ سۆراغە.

لەلایەكی دیكەوە: كەسوكاری جووتیارە كوردەكە قسەیان بۆ دیار محەممەد، پەیامنێری كەركووكی ئاڤا میدیا كردووە و جەختیان كردووەتەوە كە هیچ گرفتێكی كۆمەڵایەتییان نییە  و كوڕەكەیان گرفتی لەگەڵ هیچ كەسێكدا نەبووە.

ئەمەش بزانە: پۆلیسی شارۆچكەی پردێ ئەو كەسەیان دەستگیر كردووە كە بەرەبەیانی ئەمڕۆ ئۆتۆمبێلی جووتیارە كوردەكەی دۆزیوەتەوە و لێكۆڵینەوەی پۆلیس لەگەڵی بەردەوامە.