لە پێنجوێن دوو بازرگانی گەورەی ماددە هۆشبەرەکان دەستگیر کران

ئاڤا نیوز

لە ئۆپەراسیۆنێکی هاوبەش و تایبەتدا لەنێوان دامەزراوەکانی هەرێمی کوردستان و دەزگا فیدراڵییەکان، توانرا دوو بازرگانی گەورەی ماددە هۆشبەرەکان دەستگیر بکرێن و دەستیش بەسەر بڕێکی زۆر ماددەی هۆشبەردا بگیرێت.

 

لێدوانی فەرمی: عەقید سەلام، عەبدولخالق، وتەبێژی دەزگای ئاسایشی هەرێمی کوردستان بە ئاڤا میدیای ڕاگەیاند: "بە هەماهەنگی لەگەڵ بەڕێوەبەرایەتیی گشتیی کاروباری ماددە هۆشبەرەکانی فیدراڵی و بە هاوکاریی هێزە ئەمنییە فیدراڵییەکان، توانیمان دوو بازرگان دەستگیر بکەین کە بڕێکی زۆر ماددەی هۆشبەریان پێبوو."

 

لە هەمان کاتدا: بەگوتەی سەلام عەبدولخالق "لە ئۆپەراسیۆنەکەدا دەست بەسەر 62 کیلۆگرام ماددەی هۆشبەردا گیراوە، کە لە جۆرەکانی کریستاڵ و ماریجوانا بوون." هەروەها ئاماژەی بەوە کرد کە ئۆپەراسیۆنەکە لە ناوچەی پێنجوێن ئەنجام دراوە، بەبێ ئەوەی زانیاریی زیاتر لەبارەی شوێن و ناسنامەی تۆمەتبارەکان ئاشکرا بکات.

 

لەلایەکی دیکە: بەڕێوەبەرایەتیی گشتیی کاروباری ماددە هۆشبەرەکانی فیدراڵی لە ڕاگەیێنراوێکدا  ئاماژە بۆ ئەوە دەکات، هەڵمەتەکە لەسەر بنەمای هەوڵێکی هەواڵگریی هاوبەش لەنێوان "بەڕێوەبەرایەتیی کاروباری ماددە هۆشبەرەکانی کەرخ" و "بەڕێوەبەرایەتیی نەهێشتنی ماددە هۆشبەرەکانی سلێمانی" ئەنجام دراوە.

 

لە بەیاننامەکەدا هاتووە، "دەست بەسەر 41 کیلۆگرام ماددەی کریستاڵ و 21 کیلۆگرام ماددەی ماریجوانادا گیراوە کە لەلایەن تۆمەتبارانەوە حەشاردرابوون".

 

ئەوەی پێویستە بیزانیت: ئەم ئۆپەراسیۆنەش لە چوارچێوەی هەوڵە ئەمنییە هاوبەشەکاندا دێت بۆ سنووردارکردنی بڵاوبوونەوە و بازرگانیکردن بە ماددە هۆشبەرەکان، بەتایبەتی لە ناوچەکانی هەرێمی کوردستان کە هەماهەنگییەکی زیاتر لە نێوان دەزگا ئەمنییەکانی هەرێمی کوردستان و فیدراڵیدا بەخۆوە دەبینێت.