ڕاگەیێنراوێکی بەپەلە لە ئەنجوومەنی ئاسایشی هەرێمی کوردستانەوە

ئاڤا دیجیتاڵ

 

شەوی دووشەممە 15-01-2024 هێرشی مووشەکی کرایە سەر چەند ناوچەیەکی مەدەنیی هەولێر و ئێران بەرپرسیارێتیی خۆی لە هێرشەکە راگەیاند. ئەنجوومەنی ئاسایش لەو بارەیەوە دەڵێت: "پێویستە لە ئاستی ناوخۆی عێراق و لە ئاستی نێودەوڵەتیش هەنگاوی ڕژد بنرێت تاکوو سەروەریی عێراق و هەرێم بپارێزرێت".

 

لێدوانی فەرمی: "دوای ئەو هێرشە مووشەکییە ترسنۆکانەی سەر هەولێر و کاردانەوەی توندی حکومەتی عێراق لە ئیدانەکردن و پێکهێنانی لێژنەی لێکۆڵینەوە، هەندێ دامودەزگای سەر بە ئێران بە بڵاوکردنەوەی هەواڵ و وێنەی ساختە و ناپەیوەندیدار، دەستیان بە چەواشەکاری کردووە تاکوو پاساو بۆ کردارە دڕندانەکەیان بێننەوە". ئەنجوومەنی ئاسایشی هەرێمی کوردستان لە ڕاگەیێنراوێکدا وای گوت. 

 

"دامودەزگاکانی هەرێمی کوردستان، هەموو هاوکارییەکی ئەو لێژنەیە دەکەن کە لە لایەن حکومەتی فیدراڵی پێکهاتووە و زۆر ئاشکرایە کە ئەم هێرشە خەڵکی سڤیلی هەرێمی کوردستانی کردووەتە ئامانج و ئەم هەوڵانەش ناتوانن ئاراستەی ڕای گشتیی تووڕەی هەرێمی کوردستان و عێراق لە بەرامبەر ئەو تاوان و پێشێلکارییە بگۆڕن".

 

لەلایەکی دیکەوە: هەرێمی کوردستان پابەندی دەستوور و یاساکانی عێراق و هەرێمی کوردستانە، ئەو بەشەی هێزی هاوپەیمانانیش کە لە هەرێمی کوردستان بوونی هەیە بە ئاگاداری و رەزامەندیی حکومەتی فیدراڵییە.

 

"پێویستە لە ئاستی ناوخۆی عێراق و لە ئاستی نێوەدەوڵەتیش هەنگاوی ڕژد بنرێت تاکوو سەروەریی عێراق و هەرێمی کوردستان بپارێزرێت و هاووڵاتییانمان لە مەترسیی ململانێ ناوچەییەکان بپارێزین".

 

باکگراوند: شەوی دووشەمە 15-1-2024، سووپای پاسدارانی ئێران بە ژمارەیەک مووشەکی بالیستیک، هێرشی کردە سەر چەند ناوچەیەکی مەدەنیی هەولێر و لە ئاکامدا چوار هاونیشتمانی گیانیان لەدەستدا و تاوەکو ئێستاش کەسێک بێسەروشوێنە.