ئەندامێكی ئەنجوومەنی پارێزگای كەركووك: ڕژدین 32%ـی شایستە و بەركەوتەكان بۆ توركمانەكان بێت

ئاڤا نیوز

ئەندامێكی ئەنجوومەنی پارێزگای كەركووك لە پێكهاتەی توركمان دەڵێت، كاری لەپێشینەی ئەو لیژنە باڵایەی لەلایەن پارێزگاری كەركووك و ئەنجوومەنی پارێزگا پێكهێنراوە، پێداچوونەوە دەبێت بە پۆستە ئیدارییەكانی ناحیەی پردێ. دووپاتیشی دەكاتەوە كەوا ڕژدن لەسەر ئەوەی توركمان هاوشێوەی كورد و عەرەب، 32%ـی پۆستەكان و میلاكی دامەزراندنی بەركەوێت.

چیرۆكی سەرەكی: دوای دروستبوونی گرژییەكانی ئەمڕۆی ناحیەی پردێ بەهۆی داواكاریی توركمانەكان بۆ پۆستە ئیدارییەكانی ناحیەكە، ئەنجوومەنی پارێزگای كەركووك لەسەر ڕاسپاردەی پارێزگاری كەركووك، بە فەرمانێكی كارگێڕی بڕیاریدا بە پێكهێنانی لیژنەیەكی باڵا بەمەبەستی دووبارە پێداچوونەوە بە هاوسەنگی لە پۆستە ئیدارییەكانی قەزا و ناحیەكانی پارێزگای كەركووك لەماوەی مانگێكدا.

لێدوانی فەرمی: ئەحمەد ڕەمزی، ئەندامی ئەنجوومەنی پارێزگای كەركووك لە پێكهاتەی توركمان، لە لێدوانێكی بۆ دەزگاكانی ڕاگەیاندن ئاماژەی بەوەكرد، لیژنەی پێكهێنراو پێشینەی كارەكانی لە ناحیەی پردێ دەستپێدەكات و "لە ڕۆژی دووشەممەی داهاتووەوە هەنگاوی جددی و كردەیی بۆ دووبارە هاوسەنگكردنەوەی پۆستە ئیدارییەكان دەهاوێژین"، بەلەبەرچاوگرتنی بەركەوتەی هەڵبژاردنی پێكهاتەی توركمانی.

ئەو ئەندامەی ئەنجوومەنی پارێزگای كەركووك دووپاتیشی كردەوە، "ڕژدین لەسەر ئەوەی ڕێژەی 32%ـی پۆست و خزمەتگوزاری و تەنانەت میلاكی دامەزراندیش بۆ پێكهاتەی توركمانی بێت، هەروەك چۆن كورد و عەرەب هەریەكەیان ئەو ڕێژەیان بەركەوتووە".