گۆڕانی كوردسات: ڕاگرتنی مووچەی مووچەخۆرانی هەرێمی كوردستان بڕیارێکی سیاسییە

ئاڤا نیوز

باڵی كوردساتی بزووتنەوەی گۆڕان ڕایدەگەیێنێ، بڕیاری ڕاگرتنی مووچەی خەڵكی كوردستان بڕیارێكی سیاسی و نادەستوورییە، داواش دەكات، چیتر مووچە نەکرێتە کارتی سیاسیی و خەڵکی کوردستان باجی کێشەکان بدەن.

 

چیرۆكی سەرەكی: ئەمڕۆ پێنجشەممە، لە شاری سلێمانی كۆبوونەوەی جڤاتی نیشتمانیی بزووتنەوەی گۆڕانی باڵی كوردسات بەسەرپەرشتیی دانا ئەحمەد مەجید، ڕێكخەری گشتیی بزووتنەوەكە بەڕێوەچوو.

 

ڕاگەیێنراوی فەرمی: بەپێی بڵاوكراوەی میدیای فەرمیی بزووتنەوەكە، ئاڵۆزییەکانی ناوچەکە و کاریگەری لەسەر عێراق و هەرێمی کوردستان، کێشەکانی نێوان حکومەتی فیدڕاڵ و حکومەتی هەرێمی كوردستان بەتایبەت بڕیاری ڕاگرتنی مووچەی فەرمانبەران، خۆڕێکخستنەوە و ئامادەکارییە ڕێکخراوەییەکانی بزووتنەوەکە، ئەو تەوەرانە بوون کە گفتوگۆیان لەبارەیەوە کرا.

 

بابەتی ستراتیژی: گۆڕانی كوردسات، بڕیاری ڕاگرتنی مووچەی فەرمانبەران لەلایەن وەزارەتی دارایی حکومەتی فیدڕاڵییەوە، وەک "بڕیارێکی سیاسیی و نادەستوریی دژی خەڵکی کوردستان" ناودەبات، بەلەبەرچاوگرتنی بارگرانیی ژیانی فەرمانبەران، گۆڕان داوای چارەسەری ئەم کێشەیە لەسەر بنەمای دەستوور و یاسا و بڕیارەکانی دادگای فیدڕاڵی دەكات کە چیدیکە مووچە نەکرێتە کارتی سیاسیی و خەڵکی کوردستان باجی کێشەکان بدات.

 

لەلایەكی دیكەوە: لەبارەی دۆخی ناوخۆیی گۆڕان، جڤاتی نیشتمانیی بزووتنەوەكە بەپێویستی دەزانێت بەهەماهەنگی لەگەڵ کۆمیسیۆنی باڵای سەربەخۆی هەڵبژاردنەکانی عێراق، ئاستەنگە یاسایی و سیاسییەکان لاببرێت.