فڕۆكەیەک دوای كردنەوەی ڕێڕەوی فڕۆكەخانەی هەولێر نیشتەوە

ئاڤا نیوز

 

دوای کەوتنەخوارەوەی درۆنێک لە نزیک فڕۆکەخانەی هەولێر، فرۆكەیەكی هێڵی ئاسمانیی فلای ئەربیل بەهۆی داخستنی ڕێڕەوی فڕین (مەدرەج)ـی فرۆكەخانەی نێودەوڵەتیی هەولێر، بۆ ماوەیەك نەیدەتوانی بنیشێتەوە.

 

چیرۆکی سەرەکی: كاتژمێر 9ـی ئەمشەو دەنگی چەند تەقینەوەیەكی بەهێز لە نزیك هەریەک لە فڕۆکەخانە نێودەوڵەتییەکانی هەولێر و کەرکووک بیستران، ئەو هێرشە درۆنیانە هیچ زیانی گیانیان نەبوو، بەڵام ترسێكی زۆریان بڵاوکردەوە و بەشێوەیەکی کاتی گەشتەکانی فڕۆکەخانەی نێودەوڵەتیی هەولێر ڕاگیران.

 

لێدوانی فەرمی: لاوەند مەموندی، بەڕێوەبەری ڕێگەپێراوی کۆمپانیای فلای ئەربیل بۆ ئاڤا میدیا ڕایگەیاند، "فڕۆکەیەکی فلای ئەربیل لە نێوان ئاسمانیی هەولێر و کەرکووک بەهۆی داخستنی فڕۆکەخانەی نێودەوڵەتیی هەولێر بۆ ماوەیەك نەیتوانی بنیشێتەوە، بەڵام دوای كردنەوەی ڕێڕەوی فڕینی فڕۆكەخانەكە، فرۆكەكەی فلای ئەربیل نیشتەوە.

 

ڕاگەیێنراوی فەرمی: دژە تیرۆری کوردستان ڕایگەیاند، کاتژمیر 9:58 ئەمشەو لە نزیک فڕۆکەخانەی نێودەوڵەتیی هەولێر، درۆنێکی بۆمبڕێژکراو خرایە خوارەوە.

 

لەلایەكی دیكە: دانا تۆفیق، بەڕێوەبەری گشتیی فڕۆکەخانەی نێودەوڵەتیی هەولێر بەوەکالەت بە ئاڤا میدیای ڕاگەیاند: گەشتەکانی فڕۆکەخانەی نێودەڵەتیی هەولێر ئاسایی کرایەوە و گەشتەکان دەستیان پێکردەوە، بەهۆی ڕووداوەکە تەنیا یەک فڕۆکەی فلای ئەربیل کاتی دابەزینی دواخرا، ڕووداوەکە هیچ زەرەر و زیانێکی بۆ فڕۆکەخانەکە نەبووە.