لە دوو ئۆپەراسیۆنی ئەمنیدا لە بەغدا و بابل چەند کەسێک دەکوژرێن

ئاڤا نیوز

لە دوو ئۆپەراسیۆنی ئەمنیی جیاوازدا بۆ دەستگیرکردنی دوو بازرگانی ماددەی هۆشبەر لە بەغدای پایتەخت و پارێزگای بابل، چەند کەسێک کوژران.

چیرۆکی سەرەکی: تیمەکانی بەڕێوەبەرایەتیی گشتیی نەهێشتنی ماددەی هۆشبەر دوو ئۆپەراسیۆنی جیاوازیان لە بەغدای پایتەخت و پارێزگای بابل ئەنجامدا، دوای شەڕ و پێکدادان لەگەڵ داواکراواندا کارمەندێکی هێزە ئەمنییەکان دەکوژرێت و ئەفسەرێکیش بریندار دەبێت و بازرگانێک و کەسێکی دیکەش دەکوژرێن.

ڕاگەیێنراوی فەرمی: وەزارەتی ناوخۆی عێراق لەبەیاننامەیەکدا ڕایگەیاند: لە پارێزگای بابل تیمێک لە بەڕێوەبەرایەتیی نەهێشتنی ماددەی هۆشبەر هەڵیانکوتایە سەر گەورە بازرگانێکی ماددەی هۆشبەر، لەکاتی دەستگیرکردنیدا پێکدادانێکی چەکداری لەنێوان هەردوولا ڕوویدا و لەئاکامدا یەکێک لە ئەندامانی تیمەکە کوژرا و ئەفسەرێکیش بریندار بوو، هاوکات کەسێکی دیکە کوژرا کە هێشتا دۆخی تەندروستی نادیارە و لە ژێر لێکۆڵینەوەدایە.

بەپێی بەیاننامەکە، لە ناوچەی تۆبچی بەغدای پایتەخت، پێکدادانی چەکداری لەنێوان تیمێکی بەڕێوەبەرایەتیی گشتیی نەهێشتنی ماددەی هۆشبەر و بازرگانێکی ئەو ماددانە ڕوویدا، لە شوێنی ڕووداوەکە بازرگانەکە کوژرا و هیچ زیانێکی گیانیش بەر هێزە ئەمنییەکان نەکەوت.