وەزارەتی دەرەوەی توركیا لەسەر ناڕەزایی توركمانەكانی پردێ دێتە دەنگ

ئاڤا نیوز

وتەبێژی وەزارەتی دەرەوەی توركیا لەسەر پرسی بەشداریپێكردنی پێكهاتەی توركمان لە ئەنجوومەنی پارێزگاری كەركووك دێتە دەنگ و داوای بەشداریی كارای سیاسی و حكومڕانی توركمانەكان لە دامەزراوە حكومییەكاندا دەكات.

 

وێنە گەورەكە: ڕۆژی 3ـی تەمموز، بەشێك لە لایەنگرانی بەرەی توركمانی لە ناحیەی پردێ، ڕژانە سەر شەقام و بۆ جێبەجێكردنی داواكارییەكانیان، شەقامی سەرەكیی كەركووك-هەولێریان داخست. دوای ئەو پێشهاتە؛ ئەنجوومەنی پارێزگای كەركووك لەسەر ڕاسپاردەی پارێزگاری كەركووك، بە فەرمانێكی كارگێڕی بڕیاریدا بە پێكهێنانی لیژنەیەكی باڵا بەمەبەستی دووبارە پێداچوونەوە بە هاوسەنگی لە پۆستە ئیدارییەكانی قەزا و ناحیەكانی پارێزگای كەركووك لەماوەی مانگێكدا.

 

لێدوانی فەرمی: ئۆنجو کەچەلی، وتەبێژی وەزارەتی دەرەوەی تورکیا، لە ئەژماری فەرمیی خۆی لە تۆڕی کۆمەڵایەتیی 'ئێکس' ڕایگەیاندووە، "چاوەڕوانیی سەرەکیمان ئەوەیە کە هاونیشتمانە تورکمانەکانمان بە شێوەیەکی شایستە لەناو پێکهاتەی سیاسی و حكومەتی عێراقدا، نوێنەرایەتی بکرێن."
 
وتەبێژی وەزارەتی دەرەوەی تورکیا دووپاتیشی دەكاتەوە، پرسی نوێنەرایەتیی تورکمانەکان لە کەرکووک بایەخێكی تایبەتی هەیە، بەتایبەت لە دانان و پێسباردنی ئەرکەكان لە هەموو دامەزراوە گشتییەکاندا و لە سەرووی هەمووشیانەوە لە ئەنجوومەنی پارێزگای كەركووكدا.

 

لەلایەكی دیكەوە: ئەحمەد ڕەمزی، ئەندامی ئەنجوومەنی پارێزگای كەركووك لە پێكهاتەی توركمان بە ئاڤای ڕاگەیاند، كاری لەپێشینەی ئەو لیژنە باڵایەی لەلایەن پارێزگاری كەركووك و ئەنجوومەنی پارێزگا پێكهێنراوە، پێداچوونەوە دەبێت بە پۆستە ئیدارییەكانی ناحیەی پردێ. دووپاتیشی دەكاتەوە كەوا ڕژدن لەسەر ئەوەی توركمان هاوشێوەی كورد و عەرەب، 32%ـی پۆستەكان و میلاكی دامەزراندنی بەركەوێت.