شارەزاییەک: هێرشە درۆنییەکان لایەنی ناوخۆیی بە دەست لەپشتدانی دەرەکی ئەنجامییان دەدات

ئاڤا نیوز

شارەزاییەکی سەربازیی دەڵێت، هێرشە درۆنییەکان کە ماوەی چەند ڕۆژێکە پارێزگاکانی عێراق و هەرێمی کوردستانی گرتووەتەوە، لایەنی ناوخۆیی بە دەست لەپشتدانی دەرەکی ئەنجامییان دەدات، پرسیاری ئەوەش دەکات بۆچی حکومەتی عێراق ڕێکار دژی ئەو لایەنە ناگرێتەبەر.

چیرۆکی سەرەکی: ماوەی چوار ڕۆژە ناوەناوە لە چەند ناوچەیەکی عێراق و هەرێمی کوردستان درۆن و تەنی نامۆ دەکەونەخوارەوە، لەبارەی لایەنی هێرشکار و هۆکاری ئەم پێشهاتە ئەمنییانەش، تا ئێستا حکومەتی عێراق ڕوونکردنەوە و زانیاریی بۆ ڕایگشتی بڵاونەکردووەتەوە.

لێدوانی فەرمی: فڕۆکەوان ئەحمەد شەریفی، شارەزای سەربازیی لە عێراق، بە ئاڤا میدیای ڕاگەیاند، حکومەتی عێراق لە دۆخێکی شەرمەزارییدایە بەهۆی ئەوەی ناتوانێت ئەو لایەنە ئاشکرا بکات کە هێرشە درۆنییەکان ئەنجام دەدات، بۆیەش سەرەڕای ئەوەی 100% دەزانێت لایەنی هێرشکار کێیە، بەڵام بێ دەنگی هەڵبژاردووە.

زانیاریی زیاتر: بە بڕوای ئەو شارەزایە، لایەنی ناوخۆیی لەژێر کاریگەریی و دەست لەپشتدانی دەرەکی هێرشە درۆنییەکانیانی ئەنجام داون، ئامانجەکەشی ئەوەیە پێشبینیی خولێکی نوێی جەنگ لە نێوان ئێران و ئیسرائیل دەکەن، ئاشکراشی دەکات کە لەکاتێکدا هێرشەکان بەشێوەی ڕۆژانە بەردەوامن، بەڵام تا ئێستا حکومەتی عێراق لیژنەی لێکۆڵینەوەی لەبارەیانەوە پێکنەهێناوە.

ئەحمەد شەریفی دەشڵێت، عێراق توانای بەرپەرچدانەوەی ئەو جۆرە هێرشانەی نییە، جەختیش دەکاتەوە لەوەی "ڕەنگە ئەم هێرشانە بەردەوام بن و زیاتریش ببن، ئەوەش پەیوەستە بە پێشهات و گرژییەکانی ناوچەکەوە".