ئاژانسی نێودەوڵەتیی وزەی ئەتۆم پشکنەرانی ئاژانسەکەی خۆی لە ئێران کشاندەوە

ئاڤا نیوز

ئاژانسی نێودەوڵەتیی وزەی ئەتۆمی ڕایگەیاند کە تیمێکی پشکنەرانیان کە لەکاتی جەنگی نێوان ئیسرائیل و ئێران لە تاران بوون بە سەلامەتی ئێرانیان جێهێشتووە و گەڕاونەتەوە بۆ بارەگای ئاژانسەکە لە ڤیەننا.

زانیاریی بەدەستهاتوو: ڕۆژنامەی وۆڵ ستریت جۆرناڵی ئەمریکی ڕایگەیاند:  ئاژانسی نێودەوڵەتیی وزەی ئەتۆمی بەهۆی نیگەرانی ئەمنییەوە پشکنەرەکانی لە ئێران کشاندووەتەوە، ئەو پشکنەرانە لە تارانەوە بۆ ئەرمەنستان لە ڕێگەی وشکانییەوە گواستراونەتەوە.

لێدوانی فەرمی: ڕافایێل گرۆسی، بەڕێوەبەری گشتی ئاژانسی نێودەوڵەتیی وزەی ئەتۆم، دوای ئەم ڕاگەیاندنە جەختی لەسەر پێویستی بەپەلەی دیالۆگ لەگەڵ ئێران کردەوە سەبارەت بە میکانیزمی پێویست بۆ دەستپێکردنەوەی چالاکیەکانی چاودێری و پشتڕاستکردنەوەی ئاژانسەکە لە ئێران.

زانیاریی زیاتر: سووربوونی بەڕێوەبەری گشتی ئاژانسی نێودەوڵەتیی وزەی ئەتۆم لەسەر دەستپێکردنەوەی چاودێریکردنی دامەزراوە ئەتۆمییەکانی ئێران لە کاتێکدایە کە لەم دواییانەدا ئەنجوومەنی ڕاوێژکاری ئیسلامی ئێران یاسایەکی دەرکرد کە هاتنە ناوەوەی هەر پشکنەرێک بە بەڕێوەبەری گشتیی ئاژانسەکەشەوە بۆ ناو وڵات قەدەغە دەکات و دانانی کامێرای پاراستن و پرۆتۆکۆلی زیادە ڕادەگرێت.

سەرەڕای ئەوەش، هەر ڕاپۆرتێک لەسەر چالاکییە ئەتۆمییەکانی ئێران بە ئاژانسەکە قەدەغە کراوە ئەمە لە کاتێکدایە کە مەسعود پزیشکیان، سەرۆککۆماری ئیسلامی ئێران ڕۆژی چوارشەممەی ڕابردوو یاسای هەڵپەساردنی هاوکاری لەگەڵ ئاژانسی نێودەوڵەتیی وزەی ئەتۆمی ڕاگەیاند.