‎‏‎لە هەرێمی کوردستان تا ئێستا 66%ـی گەنمی جووتیاران وەرگیراوە

ئاڤا نیوز

بەگوێرەی ئەو داتایە بێت وەزارەتی بازرگانی هەرێمی کوردستان بڵاویکردوەتەوە، لەماوەی 25 ڕۆژدا لە هەر سێ پارێزگاکەی هەرێمی کوردستان تا ئێستا تەنیا 66%ـی گەنمی جووتیاران وەرگیراوە.

چیرۆکی سەرەکی: ڕۆژی 10ـی حوزەیران پڕۆسەی وەرگرتنی گەنمی ئەمساڵ لە سلێمانی و دهۆک دەستیپێکرد و ڕۆژی 12ـی مانگ لە هەولێر پرۆسەکە دەستیپێکرد. بەغداش ڕایگەیاندووە تەنیا 400 هەزار تۆن گەنمی جووتیارانی هەرێمی کوردستان وەردەگرێت.

ڕاگەیێنراوی فەرمی: وەزارەتی بازرگانی هەرێمی کوردستان ڕایگەیاند، تاوەکو ڕۆژی پێنجشەممە، لە هەر سێ پارێزگاکەی هەرێمی کوردستان لە 10 سایلۆ و دوو بنکەدا، 265 هەزار تۆن گەنم وەرگیراوە. ئەمەش بەڕێژەیی دەکاتە 66%ـی بڕی دیاریکراو.

ژمارەکان وادەڵێن: داتاکانی وەزارەتی بازرگانی دەریدەخات لە پارێزگاکان ڕێژەی وەرگرتنی گەنم بەمجۆرە بووە:

پارێزگای هەولێر: لە یەک سایلۆ و بنکەیەک 78 هەزار تۆن وەرگیراوە

پارێزگای سلێمانی: لە پێنج سایلۆ و بنکەیەک 106 هەزار تۆن وەرگیراوە.

پارێزگای دهۆك: لە چوار سایلۆدا 81 هەزار تۆن گەنم وەرگیراوە.

ئەوەی پێویستە بیزانیت: ئەمساڵ پشکی پارێزگاکانی هەرێمی کوردستان بەمجۆرە دیاریکراوە:

هەولێر: 122 هەزار و 600 تۆن

سلێمانی: 145 هەزار و 567 تۆن

دهۆک: 117 هەزار و 911 تۆن

هەڵەبجە: 13 هەزار و 923 تۆن